“Rarana ary tsy azo atao intsony ny mizara fitaovana mandritra ny fampielezan-kevitra”. Io no anisan’ny fanapahan-kevitry ny mpizaika tamin’ny dinika fanomanana ny fifidianana, nofaranana teny amin’ny CCI, Ivato, omaly. Namaky izany ny olona loharanon-kevitra iray, Rakotondratafika. Tapaka fa fandaniana ny lalàmpanorenana vaovao no latsa-bato hatao voalohany hametrahana rafitra vaovao mifehy ny Repoblikan’i Madagasikara. Tsy handray anjara ary tsy mahazo mandray anjara amin’ny fampielezan-kevitra ireo fiarahamonina sivily. Ho fanajana ny tsy fitanilana izay, araka ny sata iraisam-pirenena. Mahazo mandray anjara amin’ny fampielezan-kevitra kosa ny mpiasam-panjakana, fa tsy mahazo mandray anjara ireo mpiasam-panjakana ambony voafaritry ny lalàna sy ireo voatendry tamin’ny didim-pitondrana lany tamin’ny filankevitry ny minisitra. Hamafisina ireo sazy ary hampiharina ho an’ireo mampiasa fitaovam-panjakana hanaovana fampielezan-kevitra. Tsy misy fetra ny vola azo laniana amin’ny fampielezan-kevitra amin’ny fitsapankevi-bahoaka. Afa-mandray anjara amin’ny latsa-bato ireo Malagasy monina any ivelany, ary any ivelany ihany no hanaovany latsa-bato. Tazonina ny fampiasana kara-pifidianana. Misy ireo fanitsiana na fanavaozana ireo fe-potoana mifehy ny fitsapankevi-bahoaka.
Nambaran’ny Praiminisitra Rajaonarison Mamitiana, tamin’ny famaranana, nitondrany ny tenin’ny filohan’ny Fanavaozana, fa Repoblika matanjaka no hatolotra ho an’izay ho mpitondra voafidy eo, Repoblika misy ny rariny, Repoblika mangarahara, Repoblikan’ny firahalahiana na tsy mitovy aza ny hevitra. Voarainy ny fanapahan-kevitra. “Rehefa tonga ny fotoana hamadihana azy ho lalàna, tsy maintsy ho hitan’ny rehetra hoe manaja ny hevitra nifanarahana sy tapaka no haroson’ny governemanta”, hoy izy.
R. Nd.
French