“Mitondra hafatra ho an’ny zanak’i Fianarantsoa tsy ankanavaka izahay. Aoka hitandrina toy ny anakandriamaso ny firaisankina ao anatin’ny fahasamihafana isika; aoka handala ny fifankatiavana sy ny fihavanana ary ny fandeferana.” Io ny fanambaran’ny Fikambanan’ny zanaky ny faritanin’i Fianarantsoa (Fizafafi), novakin’ny filoha lefitra, Razafimandroso Aurelien, teny Ambatoroka, afakomaly, manoloana ny kabarin’ny filohan’ny Antenimierampirenena sady filoha nasionalin’ny Fizafafi, Razanamahasoa Christine, tany Fianarantsoa, ny faran’ny herinandro teo. Na eo aza ny firehan-kevitra maro tsy mitovy, entanina hatrany mba ho saro-piaro amin’ny hasin’ny faritany isiana.
Derainy manokana ny ezak’ireo mpitandro filaminana sy ny fahendren’ireo mpizaika rehetra, indrindra ireo niahy ny kianja Don Bosco, Ankofafa, Fianarantsoa. Satria tsy nisy ny voina, na ratra, na korontana niseho. Nirindra tao anatin’ny filaminana ny fihaonambe, na olona analinkisa aza no tonga nanatrika izany.
Raiamandreny am-panahy, ampanjaka…
Nisaorany koa ireo raiamandreny am-panahy, nitondra tamim-bavaka ny fivoriambe sy ny hetahetam-pampandrosoana ny faritany. Mankatelina feno an’ireo ampanjaka sy tangalamena ary lonaky tomponandraikitra izy. Eo koa ireo raiamandreny ara-drazana rehetra, nitarika ny zanaky ny faritra avy amin’ny misy azy ireo tsirairay avy, niara-nanamafy ny firaisankina sy nitondrana ny hetahetam-pampandrosoana ny faritra misy ny tsirairay avy.
Nisaorany manokana ny filoha nasionalin’ny Fizafafi, nanaiky amim-pitiavana hitondra ny hetahetam-pandrosoana nangatahin’ireo raiamandreny isam-paritra. Hiroso amin’ny fananganana ny Fizafafi manerana ny faritany enina ny fikambanana ankehitriny.
R. Nd.
French