Miova mpitantana nanomboka ny alatsinainy teo ny hôtel Colbert, etsy Antaninarenina.. Novidin’ny fianakaviana Vellutini, ity trano fandraisam-bahiny iray malaza eto an-drenivohitra ity. Anisan’ny teratany “Corse”, mpandraharaha malaza eo amin’ny sehatry ny kanto sy ny fialamboly ny fianakaviana Vellutini. Ankehitriny, izy ireo no mandimby ny fianakaviana Léoni, nitantana nandritra ny 50 taona mahery ny hôtel Colbert.Sangany eo amin’ny sehatry ny fanaovana sakafo sy ny fitantanana trano fandraisam-bahiny eto Madagasikara ny fianakaviana Léoni. Nanana ny toerany manokana izy, niavaka hatrany tamin’ireo sehatra niasany.
Manan-tantara eto amin’ny Renivohitry ny Nosy ny toeran’ny hôtel Colbert. Miavaka amin’ny hakantony, indrindra amin’ny maha vakoka ara-kolontsaina azy eto Antananarivo. Nanamarika vanim-potoana sy tantara maro eto Antananarivo rahateo ity trano fandraisam-bahiny ity. Araka izany, hitazona sy hitandro ny hasarobidiny ny fianakaviana Vellutini. Tsy ho latsa-danja amin’izany koa ny fanomezana voninahitra hatrany ny tantaran’ny hôtel Colbert.
Fanavaozana
“Henin-kaja sy henim-boninahitra izany mitantana trano fandraisam-bahiny anisan’ny manamarika vanim-potoana samihafa izany”, hoy i Jacques François Vellutini, tompon’ny hôtel Colbert. Notohizany fa zava-dehibe ho azy ireo ny mitantana ity trano fandraisam-bahiny ity, noho izy manan-tantara sy manan-danja eo amin’ny sehatry ny kolontsaina malagasy. Araka izany, hanome lanja hatrany ity trano fandraisam-bahiny ity ireto tompony vaovao ireto. Ankoatra izay, hitondra fanavaozana ao an-toerana ity mpandraharaha ity saingy hitazona ireo fotodrafitrasa ara-tantara mampiavaka azy. Manamarika dingana vaovao ho an’ny fianakaviana Vellutini ihany koa ny fitantanana izao, noho izy mbola mitondra anjara biriky eo amin’ny sehatry ny indostria malagasy.
Henintsoa H.
French