Tontosa ny sabotsy 16 septambra 2023, teny amin’ny kianja Makis Andohatapenaka, ny famoahana ny Mpikalo (Mpikabary katolika), andiany faha-18, andiany Masindahy Paoly. Niisa 561 ireto andiany avy eto amin’ny diosezin’Antananarivo ireto. Reny mpiahy azy ireo Rakotondrazafy Lalatiana, minisitry ny Serasera sy ny kolontsaina. Mitohy hatrany ny fampianarana, ary tanjona ny hampivelatra ny fomba sy ny kolontsaina malagasy ao anatin’ny fampiharana sy fanajana ny fomba kristianina.
«Andrianiko ny teniko, hitoriko ny vaovao mahafaly», io ny teny manentana ny fikambanana Mpikabary Katolika na Mpikalo, vaomieran’asa eo anivon’ny Eglisy katolika apostolika romanina (EKAR). Valo taona ny zandriny indrindra, ary ramatoa fito amby fitopolo taona no zokiny indrindra. Mampiavaka ireto andiany ireto ny fiainana ny fianam-panahin’i Masindahy Paoly, izay tahafiny, ankoatra ny fiainana ny maha mpikabary, indrindra ny maha katolika. Lanonambe narahina hetsika samihafa no nentina nanolorana azy ireo ny marika famantarana ny fahavitan’ny fianarany. “Mbola hisy ny fiofanana aorian’izao saingy tsy voatery hanaraka izany intsony ireo mpikambana” hoy Rakotomalala René, filoha nasionalin’ny Mpikalo.
Hisokatra ny volana oktobra ho avy izao ny taom-pianarana vaovao ho an’ny Mpikalo, eny anivon’ny fiangonana Katolika, ato anatin’ny Diosezin’Antananarivo.
Lin
French