Nanao fanambarana, manoloana ny tranga amin’izao fotoana izao, ny eo anivon’ny FFKM, omaly. Anisan’ny notakin’izy ireo ny hisian’ny fahalalahana maneho hevitra.
Nambaran’ireo filoham-piangonana manoloana izao savorovoro sy fifampihantsiana isan-karazany izao fa ahina hipaka hatramin’ny famoizana aina sy faharavana fananana izany.
Nanterin’izy ireo ny antso avo hifampiresahana toy ny efa natao tamin’ny ankolafin-kery rehetra, araka ny fanambarana. “Mba hamerina amin’ny laoniny ny filaminana sy hikaroham-bahaolana hivoahana amin’izao krizy izao. Mitaky ny hampitsaharana ny fifampihantsiana sy ny fifandranitana, miteraka fifandonana ihany koa izahay”, hoy izy ireo.
Dinika naharitra ora roa
Hentitra ireo filoham-piangonana niantso sy nitaky ny hampitsaharana ny fifampihantsiana sy ny fifandranitana, miteraka fifandonana. “Aoka halalaka ny fanehoan-kevitra”, hoy ihany izy ireo. Nentanin’ny FFKM ny rehetra hisoroka ny herisetra. Nankahery sy nirary fahasitranana ho an’ireo naratra koa izy ireo.
Tsiahivina fa nandray ireo kandidà ny FFKM, omaly hariva. Tsy nisy nipika ny dinika naharitra ora roa. Niatrika izany ny kandidà isany, Ravalomanana Marc, Rajaonarimampianina Hery, Andrianainarivelo Hajo, Ratsiraka Roland, Razafinjoelina Tahina, Raderanirina Sendrison, Paraina Auguste, Ratsietison Jean Jacques. Solontena kosa ny an’ny kandidà, Randrianasoloniaiko Siteny sy Razafintsiandraofa Brunelle. Tsy tonga sady tsy nandefa solontena ny kandidà Andry Rajoelina.
Synèse R.
French