Dingana iray lehibe ho an’i Anisha Jo. Nampahafantatra tamin’ny fomba ofisialy, omaly, ity mpanakanto voalohany tamin’ny “Star Academy” farany ity fa hiara-hiasa amin’ny Sony Music izy. Tsy ny mpanakanto rehetra akory no alain’ity trano mpamokatra mozika iraisam-pirenena ity hiara-hiasa aminy, fa ireo izay heveriny ho tena misongadina ka afaka mivarotra sanganasa eo amin’ny tsenan’ny mozika iraisam-pirenena ihany. Tombony lehibe ho an’ity tovovavy malagasy ity, araka izany, ny fiaraha-miasa.
Vantany vao nivoaka ny fifaninanana “Star Academy” i Anisha dia efa nifantoka tamin’ny rakikirany voalohany. Nialoha izay mantsy izy dia efa nanoratra sy namoron-kira, ka anisan’izany ny “Tu rayonnes”, hira nentiny nandresy lahatra ny Sony Music. Ho tafiditra anatin’ny rakikirany voalohany, miaraka amin’ny “automnes” io.
Tsiahivina fa nanomboka ny taona 2016 no nihazo an’i Frantsa, nanohy ny fianarany, i Anisha. Nanohy hatrany ny mozika ihany koa izy nandritra izany.
Zo ny Aina
French