Manamafy ny fanajana ny ara-dalàna ny kandidà laharana fahatelo, Andry Rajoelina. Mitohy ny fampielezan-keviny. Ao Boriziny izy anio, any Fianarantsoa, rahampitso.
«Tsy tokony hahemotra 16 novambra izany ny fifidianana fa isika izao efa mandeha. Isika efa vonona ary mandeha mafy sady i Andry TGV… Misy kandidà sasany any manakorontana sy tsy vonona ary matahotra antsika noho isika tian’ny vahoaka sy i Madagasikara ka manontolo araka izao hitantsika izao», hoy ny kandidà Andry Rajoelina, omaly, tany Ambanja, manoloana ny fanapahan-kevitra navoakan’ny Fitsarana Avo momba ny Lalàmpanorenana. Manamafy kosa anefa izy fa manaja ny ara-dalàna. Mitohy rahateo ny fitetezam-paritra izay ataony hoenti-mandresy lahatra ny mpifidy mba hanohizana miaraka ny fampandrosoana an’i Madagasikara. Nambarany ombieny ombieny amin’ny lahateny izay nataony fa ho vaindohan-draharahany ny fitsinjovana manokana ny vahoaka malagasy. Misy hatrany ny fitanisana ny zava-bita sy ny fampahafantarana ny tetikasa hovitaina mba hositrahin’ny mponina eny ifotony. Anisan’ ireny ny fanampiana ny sahirana sy ny tanora tsy an’asa ary ny vehivavy . Hisitraka herinaratra koa ny ao Ambanja. “Hitondra ny fahazavana hanala ny haizina isika”, hoy izy. Nanteriny fa efa vita hatrany amin’ny 70% ny lalam-pirenena RN6, mihazo an’Antsiranana.
Tsy miova
Tsiahivina fa navoakan’ny HCC, omaly, ny didy fanemorana ho amin’ny 16 novambra ny fihodinana voalohany amin’ny fifidianana. Antony, ny fangatahan’ny kandidà Raobelina Andry. Ity farany izay naratra ka tsy afaka miasa mandritra ny 30 andro.
Notazomina kosa ny datin’ny 20 desambra hanatanterahana ny fihodinana faharoa. Nitarina herinandro izany ny fampielezan-kevitra, ka hifarana amin’ny 15 novambra. Efa voafaritry ny lalàna ho 30 andro ny faharetan’ny propagandy ho an’ny fifidianana filoham-pirenena.
Synèse R.
French