Ho avy, ary hiaka-tsehatra eto Antananarivo i Hanitra Ranaivo. Ny fandalovany farany teo mantsy, tsy nahatontosa fampisehoana azy manokana izy.
Hafaliana ho an’ny mpankafy ! Fantatra fa handalo indray eto an-tanindrazana i Hanitra Ranaivo, ary ny seho hontonsainy ny alin’ny zoma izao, etsy amin’ny Piment Café Behoririka. Vaovao mahafaly manaraka : hiray sehatra aminy i Benny, amin’ny maha samy mpikambana ao amin’ny Lolo sy ny tariny azy ireo. Tsy vitan’izay, ho avy hanaraka an’i Hanitra koa i Jean Marc Bontemps, mpitendry gitara sy mpandrindra hira fanta-daza any Frantsa sy La Réunion izay vadin’i Hanitra ihany. Hanampy azy ireo hahafeno ny seho i Nini Kaolibera, amin’io. Vao tamin’ny volana mey no nandalo taty Madagasikara i Hanitra. Nifanandrify tamin’ny fotoana nanantanterahana ny «Feo sy gitara», fampisehoana goavana natokana ho an’ny vazo an-gitara izany. Niray sehatra tamin’ireo namany mandrafitra ny Lolo sy ny tariny izy nandritra io fotoana io.
Tsy nivaona tamin’ny vazo an-gitara i Hanitra Ranaivo, na dia tsy niaraka tamin’ny Lolo sy ny tariny intsony aza. Raha tsiahivina ny tantara, niditra ho mpikambana vavy tokana tao amin’ny tarika i Hanitra, ny taona 1979. Manana ilay feo miavaka izay izy, ka lasa tsy manam-paharoa ry «Mpivahiny», «Maninona e» ary ny «Zakarandahy». Niaraka tamin’ny Lolo sy ny tariny niondrana tany Frantsa ihany koa izy, ka anisan’ireo nisafidy ny hitady lalana eo amin’ny tsenan’ny mozika iraisam-pirenena. Sarotsarotra tany am-boalohany, saingy nifikitra tamin’ny tanjony i Hanitra ka namoaka ny rakikirany voalohany ny taona 1998. «Omeko anao» ny lohatenin’ny rakikira, izay sady nanamarika ihany koa ny fiverenan’i Hanitra teo amin’ny mozika, ho an’ny mpankafy azy taty Madagasikara. Ilay rakikirany «Any aminay», nivoaka ny taona 2011 kosa no tena nentin’i Hanitra nitety tany sy hetsika maro.
Zo ny Aina
French