Nahatratra 156 ireo dahalo voasambotrin’ny zandarimarian’Imerina centrale tamin’ny resaka fakana an-keriny hatramin’ny niandohan’ny taona. Miisa 28 kosa ireo lavo taorian’ny fifandonana.
N ahatratra 156 isa ireo dahalo voasambotrin’ ny zandary avy ao amin’ny vondron-tobim-paritra Imerina centrale hatramin’ny niandohan’ny taona. Voasaringotra tamin’ny resaka fakana an-keriny avokoa ireo dahalo tra-tehaka ireo. Miisa 52 kosa ireo tratra tamin’ny resaka halatr’omby tao an-toerana. Miisa enina ireo tratra tamin’ny resaka saritsarina fakana an-keriny. Tafiakatra 41 ireo malaso voasambotra tamina resaka fanafihana mitam-piadina.
Raha ny tatitra voaray, mitotaly 28 ireo lavo taorian’ ny fifandonana, isan’izany ireo maty voatifitra ny asabotsy teo tao Antsorindrambe, fokontany Antanetibe, kaominina ambanivohitra Beronono. Anatin’ny hetsika manokana sy mametraka ny fandriam-pahalemana maharitra ao an-toerana ny zandarimarian’Imerina centrale. Araka izany, nisy ny hetsika manokana natao afakomaly vao maraim-be. Nitohy tamin’ny fifandonana tamin’ireo malaso izany ka lavo ny roalahy. Ankehitriny misy naman’izy ireo hfaa tafaporitsaka sy karohina fatratra. Azo tany amin’ireto dahalo lavo ireto ny basim-borona miisa roa, bala 30 isa ary basy mahery vaika iray. “Tsy an’ny zandarimariam-pirenena velivevely ilay basy mahery vaika io. Araka izany, ny fanadihadiana no ahitana izay mety ho niavian’ireo fitaovam-piadina ireo”, hoy ny fanazavana voaray. Nambarany fa vao nisy naman’ireo andian-dahalo ireo roa hafa lavo rehefa nifanehitra tamin’ny zandary ny alatsinainy lasa teo.
Basy
Tao anatin’izay 11 volana izay, mitotaly 28 ireo basy notanana tsy ara-dalàna. Ao anatin’izany ny basy mahery vaika iray, basy vita gasy 15 isa. Ao koa ny basim-borona 11 isa ary basy poleta iray, raha ny tatitra voaray avy amin’ny zandarimarian’Imerina centrale.
Mitotaly 39 ireo tompon’ andraikim-panjakana sy olon-tsotra voasaringotra tamin’ny famotsian’omby. Misy ireo misazy vokatr’izany, ao koa irao nahazo fahafahana vonjimaika amin’izany. Olon-tsotra miisa valo ireo migadra any am-ponja, delegem-panjakana kosa ny iray amin’izany. Olona miisa 30 ireo nahazo fahafahana vonjimaika ka sefom-pokontany ny telo amin’ireo, delegem-panjakana ny telo hafa, veterinera ny roa. Tafiditra amin’izany ny mpanao vaksiny iray, andrimasom-pokonolona iray raha olon-tsotra ny 20 hafa. Tao anatin’izay 11 volana izay, miisa dimy ireo jiolahy nitolo-batana, hoy hatrany ny zandarimaria.
Henintsoa Hani
French