« Ny zava-misy no fandrisika voajanahary ho an’ny aingam-panahy », hoy i Zo Maminirina, poeta sady mpanoratra. Isaky ny mandia vanim-potoana iray ny talenta, misy mipoitra hatrany. Rehefa mety ho asa famoronana, ahitana azy io avokoa. Lehibe indrindra amin’izany ny zavakanto sy ny kolontsaina. Mafampana, ohatra, ny tontolo politika. Misy poeta na mpanoratra avoakan’io vanim-potoana io. Tahaka izany koa ny sary na tantara an-tsary na sary hosodoko, sns. Fohazin’ny zava-misy ny talenta.
Ny vanim-potoana lalovana ihany koa no ipoiran’ny tanora miditra anaty famoronana. Tanora 15 taona no ho miakatra, manoratra tononkalo « mivaivay », mitsikera na mandoka ireo « mpilalao politika » sy ny zavatra ataony. Tahaka izany koa, tanora mpanao sariitatra, manatsikafona ankolaka na mivantana ny zavatra iainany ao anatin’ny vanim-potoana iray.
Ny talenta mifoha fa misy koa ny teraky ny saina
Eo amin’ny tontolon’ny soratra ny isongadinan’ity tranga iray ity. Mifoha avy amin’ny zava-misy iainana ny talenta. Fa ny mpanoratra na ny poeta, afaka maneho haisoratra teraky ny saina. « Tena mandrafitra mihitsy ilay mpanoratra mba ho lasa zavakanto ny sanganasany », hoy i Zo Maminirina. Izany hoe, mifoha noho ny zava-misy ny talenta, fa ny saina kosa no manangana izany ho zavakanto.
Raha io fanadihadiana io no iaingana, tokony hitombo isa isaky ny vanim-potoana « mivaivay na misongadina » ny mpamorona !
HaRy Razafindrakoto
French