Vehivavy iray naratra latsaka tao anaty lavaka teny Andrefan’Ambohijanahary, afakomaly hariva. Niakatra izaitsizy ny rano tao anatin’ny ora-nikija. Avy nirava niasa izy tamin’io fotoana io ka teny an-dalana hody no nitranga ny loza. Latsaka tao anaty lavaka izy saingy voatazon’ireo olona niara-dalana taminy. Tsy hay rahateo ny manavaka ny lalana misy lavaka rehefa miakatra toy izao ny rano.
Natolotra ny fampanoavana omaly, ireo roa vavy mpanao trafikana zava-mahadomelina. Tratran’ny polisy misahana ny ady amin’ny fiparitahan’ny zava-mahadomelina teny Ivandry izy ireo, ny alatsinainy teo. Teo am-pivarotana rongony mihitsy izy ireo tamin’ny fotoana nahatongavan’ny polisy. Nilaza izy ireo fa eny Sabotsy Namehana ny mpamatsy rongony, ka amidy antsinjarany indray izany.
Voasambotry ny zandary ao amin’ny tobim-paritra Ambohimangakely teo am-panendahana mpandeha taxi-be ny jiolahy gagilahy, afakomaly. Efa narahi-maso ity farany ity noho izy manendaka sy mangarom-paosy. Nahitana finday avolenta tany aminy. Nilaza ho tsy mahafantatra ny tompony ity farany. Efa misy mpividy sy mpandray halatra miray tsikombakomba aminy, raha ny filazany.
Ravan’ny zandary ao amin’ny tobim-paritra Toliara ny tambajotran-jiolahy mpamaky trano sady mpangalatra moto no mpanamboatra basy vita tanana ao an-toerana, afakomaly. Roa lahy no voasambotra voalohany teo am-panaovana ny asa ratsiny. Tratra tao an-tranon’izy ireo ny entana halatra niaraka tamin’ny moto, eo am-panamboarana nomerao motera. Nahitana bala mahery vaika niaraka tamin’ireo.
French