Noravan’ny Elefantan’i Côte d’Ivoire ny nofinofin’ny Lionan’i Teranga Senegal, eo amin’ny fiadiana ny ho tompondakan’i Afrika ho an’ny ekipam-pirenena, taranja baolina kitra (Can 2024). Tapitra teo amin’ny ampahavalon-dalana ny dian-dry zalahy.
Lavo ny andrarezina. Nifarana ny alatsinainy lasa teo, tao amin’ny kianja Charles Konan Banny de Yamoussoukro, ny lalan’ny Lionan’i Teranga Senegal, tompondaka farany amin’ny fiadiana ny ho tompondakan’i Afrika, taranja baolina kitra (Can 2024). Notaperin’ny Elefantan’i Côte d’Ivoire, teo amin’ny dingana ampahavalon-dalana ny nofinofin-dry zalahy. Resiny tamin’ny fandakana ny “tirs au but”, 5 no ho 4, ireto Gôliatan’i Afrika ireto. Raha tsiahivina, nanokatra ny isa voalohany ny Liona, tamin’ny alalan’i Diallo, teo amin’ny minitra faha-4, taorian’ny tolotra nataon’i Mané. Efa tany amin’ny faha-85 mn kosa vao nosahalain’ny Elefanta izany, taorian’ny “penalty” tafiditr’i Kessié. Nentin’ny roa tonta nisaraka io isa mitovy 1 sy 1 io. Niditra tamin’ny fanalavam-potoana saingy tsy mbola nisy nivoaka ho mpandresy ka tany amin’ny fandakana ny “tirs au but” vao afaka ny Elefanta. Tsy mbola afa-bela tamin’i Côte d’Ivoire indray izany i Senegal. Raha tsiahivina, tamin’ny 2013 ny fihaonana ofisialy nikatrohan’ny roa tonta farany niadiana ny tapakila, hiatrehana ny “Mondial 2014” ka resin-dry Drogba, tamin’ny isa 3 no ho 1, ry zalahy tamin’izany.
Marihina fa vitan-dratsy ho an’ny ekipa tompondaka ny “Can”, tao anatin’ny 7 taona noho mankaty. Izay nahazo ny amboara tsy nisy nihoatra ny ampahavalon-dalana. Ny taona 2012, tompondaka i Zambie, tsy nivoaka vondrona nandritra ny “Can 2013”. Tsy nahazo ny tapakila hiatrehana ny “Can 2015” i Nigeria tompondaka 2013. 2017, tsy nivoaka vondrona ny Elefanta ary ny 2022, resy ampahavalon-dalana i Cameroun. Tamin’ny 2022, anjaran’i Algerie indray ny tsy tafavoaka vondrona ary tamin’ity dia i Senegal.
Tompondaka
French