“Manan-danja loatra amintsika ny hasin’ny fitiavan-tanindrazana. Izay indrindra no nisafidianana manokana ny teny faneva fankalazana hoe: Madagasikara mandroso, Malagasy miara-mientana ao anatin’ny fitiavan-tanindrazana”, hoy ny filohan’ny Repoblika, Rajoelina Andry, tamin’ny kabary fanombohana ny matso teny amin’ny kianja Barea, Mahamasina, omaly, tao anatin’ny fankalazana ny 26 jona. Tandroka aron’ny vozona miaro ny vahoaka sy ny fananany ny Foloalindahy. Aron’ny tany sy mampanjaka ny fandriampahalemana, miaro ny fiandrianam-pirenena. Mitaky fanoloran-tena sy fitiavan-tanindrazana izany. Andro lehibe no natrehina, nanamarihana ny fankalazana amin’ny fomba mendrika tamin’ny matso. Mijery sy matoky ny Foloalindahy ny Malagasy rehetra.
Nanontany ny Foloalindahy ny filoha ny amin’ny fahavononan’izy ireo hanatanteraka ny matso, hiaro ny fiandrianam-pirenena, hiaro ny fanjakana mijoro, ary hametraka ho ambony ny hasin’ny vahoaka malagasy. Ilaina tanterahina ao anatin’ny firaisan-tsaina sy fiombonam-po ny fampandrosoana ny firenena. “Tsy hanaiky hozarazaraina isika, fa hiara-kiroso sy hiara-kisalahy hampandroso ao anatin’ny vina hapetraka ity Nosy malalantsika ity. Koa sahy ve ianareo hiaro hatrany ny fiandrianam-pirenena?”, hoy ihany ny fanontaniany ny Foloalindahy. Noho izany, natomboka ny matso. Enga anie hamelona ny afon’ny fitiavan-tanindrazana ao am-pon’ny tsirairay avy ny fankalazana. Ny faniriana dia hiray fo sy saina ary hiray hina ny Malagasy rehetra, hiara-kandroso sy hampandroso ny firenena.
R. Nd.
French