Tia tanindrazana ny Malagasy ! Tsy nahasakana azy ireo tsy hifety ny resaben’ny mpanao politika. Nizotra tanaty filaminana ny hetsika rehetra manerana ny Nosy.
Notanterahina omaly, teny amin’ny kianjan’ny Barea Mahamasina, ny fankalazana ny faha-63 taona niverenan’ny fahaleovantena sy ny nijoroan’ny foloalindahy malagasy. Nanatrika izany ny filoham-pirenena, Rajoelina Andry sy ny vadiny. Nanotrona azy ireo ny manampahefa sy olona manan-kaja maro samihafa. Toy ny fanao isan-taona, nentina nanamarika izany ny hetsika kolontsaina sy fanatanjahantena samihafa. Niavaka ny matso lehibe niarahana tamin’ny foloalindahy. « Malagasy miray hina, Madagasikara mandroso », io no tara-kevitra novoizina nandritra ny fankalazana.
Nahatratra 3 719 ny mpanao matso. Nahitana ireo andian-tafika sy vondrona samihafa. Tafika, zandary, polisy, polisy kaominaly, mpiasan’ny fadin-tseranana, polisy monisipaly, lehiben’ny ala, ary ny mpiandry fonja. Nisy ny fampisehoana ny fitaovan’izy ireo sy ny fampahafantarana ny andian-tafika na vondrona tsirairay.
Ankoatran’ny matso, nisy ny fampisehoana fahaiza-manao sy traikefa. Teo ihany koa ny fampisehoana fihetsika mirindra nataon’ny avy ao amin’ny Sekoly miaramilam-pirenena (SEMIPI) sy ny Akademia Miaramila (ACMIL) ary ny seho nataon’ny mpianatry ny ENSOA sy ny polisy mitondra kodiaran-droa.
Namaranana ny fotoana ny tapany maraina, nisy ny dihy mirindra, fampisehoana hakingana, fampisehoana niarahana tamin’ny mpanao hay ady toy ny Wushu sy Taekwondo. Fampisehoana goavana niarahana tamin’ny mpahay kanto, malaza ankehitriny no nanohizana ny hetsika ny tolakandro, ary nofaranana tamin’ny afomanga izany rehefa alina ny andro.
Lin(Mpianatra asa)
French