Anisan’ny nandrasan’ny mpanatrika sy ny mpanara-baovao ny fahatongavan’ny Tafika frantsay avy any amin’ny FAZOI, omaly, teny Mahamasina. Tsy tonga anefa izy ireo noho ny antony izay tsy nampahafantarina ny mpanatrika. Nilaza ny Jly Andriamasimanana William, tomponandraikitry ny filaminana eo anivon’ny komitim-pirenena mpanomana ny fankalazana ny fetim-pirenena (CTNO), fa tokony ho anisan’ny nandray anjara izy ireo.
Loharanom-baovao hafa no nanambara fa nisy ny fivoriana niarahan’ireo manamboninahitra ambony eto amin’ny firenena, ny alahady hariva. Izy ireo no nanapaka ny tsy ahafahan’ny Tafika Frantsay mandray anjara amin’ny matso lehibe. Efa nanatrika ny famerenana farany, nialoha ny matso izy ireo
Tsy mampiova ny fiaraha-miasa eo amin’ny Tafika frantsay sy Malagasy izany. Araka ny nambaran’ny tomponandraikitra, handefa andian-tafika handray anjara amin’ny matso fankalazana ny fetim-pirenena Frantsay ny fitondrana malagasy.
Fiaraha-miasa maro no efa nifanaovan’ity andian-tafika Frantsay ity sy ny Tafika Malagasy. Anisan’izany ny fiofanana sy fizarana traikefa ary fampitaovana ataon’ity andian-tafika ity ho an’ny Tafika Malagasy isan-tsokajiny.
Lin (Mpianatra asa)
French