Anio sy rahampitso, hahazo vahana kokoa ao anatin’ny fandaharam-potoanan’ny « Festival international de danse de création Evasion danse II » ny fifaninanana. Hotanterahina amin’ny 2 ora tolakandro, etsy amin’ny Ivokolo Analakely ny « Concours d’improvisation » ho an’ny mpandihy 20 sy mpandray anjara 20 hafa. Rahampitso, ao amin’ny Institut Français de Madagascar (IFM) Analakely no hanatontosana ilay fifaninanana soradihy, handraisana kaompania efatra anjara. Ny Dihy lavitra haneho ny« Andrianiko ny dihiko, ny an’ny hafa kosa feheziko », ao anatin’ny 25 minitra. « Manantena inona?» hodihizin’ny ADM mandritra ny 22 minitra. Ny Xtrema no haneho « Raikitra » ary ny « Diso ve?» no hoentin’ ny Master Jah eny an-tsehatra mandritra ny 25 minitra.
Tsikaritra nandritra ny tolotra nomen’ireo mpandray anjara amin’ny Festival Evasion II fa anisan’ny tia mandihy ny Malagasy. Manomboka voasarika amin’ny famoronana soradihy ny tanora. Tazana hatrany ihany koa ilay aingampanahy mifaka amin’ny kolontsaina malagasy, hany ka tsy sarotra amin’ny mpijery ny mandray ny tian’ny soradihy tsirairay hambara. Iray amin’ireny, ny fahitana ny karazana asa famoronana tsy mifanalavitra amin’ny dihy vakodrazana fahita eto Madagasikara.
HaRy Razafindrakoto
French