Teny an-kianja avokoa ny ankamaroan’ireo mpanao politika tamin’ny fanamarihana ny 10 aogositra, omaly. Anisan’ izany ny teo anivon’ny RMDM, nanatanteraka fihaonana tetsy Bel Air. Nanamarika ny fahefa-taony nijoroany sady nampahatsiahy sy nampitaha ny 10 aogositra 1991 sy ny iainana amin’izao fotoana izao. “Fanavotam-pirenena ho an’ny demokrasia sy ny fampandrosoana izao raha tolona ho an’ny fanavotana sy nanafahana ny firenena ny tamin’izany”, hoy ny filoha nasionalin’ny Tim, Ravalomanana. Tsy nifanalavitra amin’izany avokoa ny nambaran’ireo antoko politika, nandaha-teny. “Ny fitiavan-tanindrazana no mampiray antsika”, hoy izy ireo.
Etsy andaniny, voasakantsakan’ny zandary teny an-dalana ny famoriam-bahoaka anaty trano nataon’ny HVM tany Ampanefena, Vohemar, omaly. Raikitra ihany anefa izany avy eo. “Tsy voahaja ny zo fototra hifamezivezy. Notsenain’ny mpitandro filaminana mirongo basy izahay. Olona tia filaminana , manaja filaminana ary indrindra manaja ny lalàna hatrany izahay”, hoy ny filoha teo aloha, Rajaonarimampianina Hery.
Nihaino ny olan’ny vahoaka sy ny fitarainany tao amin’ny Fark Md Josefa Ambositra kosa ny Mihava Tour, tarihin’ny depiote, Randrianasoloniaiko Siteny. Nambarany fa anisan’ny hojerena ho an’iny faritra Amoron ‘i Mania iny ny toekarena miroborobo. Tafiditra ao anatin’ izany ny lafiny fambolena sy fiompiana. Eo ihany koa ny harena an-kibon’ny tany. “Manan-danja amin’ny toekarena sy ny asa tanana ary mahasarika ny mpizahatany izany”, hoy izy.
Synèse R.
French