Nanala ny ahiahin’ny rehetra, indrindra fa ny mpanao politika ny eo anivon’ny Ceni. Nambaran’izy ireo fa tsy olana ny ho enti-manana amin’izany.
“Tsy misy atahorantsika ny vola hanaovana fifidianana. Koa aza miahiahy isika ny amin’izay”, hoy ny filohan’ny Ceni, Andrianarisedo Dama A., teny Alarobia, afakomaly. Miantso ny mpanao politika sy ny firaisamonina sivily hiara-kientana sy hanentana ny mpifidy izy. Mba hampiakatra ny taham-pahavitrihana amin’ny fifidianana izany, ary ho tomponandraikitra ny olompirenena amin’ny fifidianana.
Tsy mahakasika manontolo ny fanavaozana ny lisi-pifidianana ny torolalana 49 naroson’ny mpanao fitsirihana nasionaly, fa misy fanatsarana mitohy. Ny tsy fahatomombanana no tena anaovana fanitsiana ny lisi-pifidianana alohan’ny hanontana ny kara-pifidianana aorian’ny 20 aogositra. Hafa amin’izay voasoratra amin’ny takelaka fanisana mpifidy, izay voadika amin’ny ordinatera. Ezahina ny hampitoviana izany tsy hampisavoritaka ny mpifidy na ny mpikamban’ny biraom-pifidianana amin’ny androm-pifidianana. “Efa voadio tanteraka ary milamina ny amin’ny anarana miverina”, hoy izy.
Miezaka miala amin’ny mampiahiahy ny Ceni. Alefa any amin’ny distrika izay ahiana hoe anarana miverina sa mampiahiahy fotsiny? Aleo manafaka olo-meloka toy izay manasazy tsy manan-tsiny, araka ny fiteny. Raha mampiahiahy ny anarana iray ka fafana ao anatin’ny lisi-pifidianana, tsy afa-mifidy sy very zo.
R. Nd.
French