48 taona i Lalie izao nodimandry izao. Tontosa ilay fandidiana natao taminy, saingy mbola nihombo ny aretiny ka nitarika ny fahafatesany. Nangina hatreo ilay feo tsy manam-paharoa…
Niady mafy izy… Tsy nahatohitra ny aretina anefa, ka nodimandry omaly maraina, Andriamazava Hanitriniala Louise, fantatry ny maro amin’ny hoe Lalie. Nangina ilay feo miavaka, ilay feo manga nampiavaka hira maro. Efa fotoana elaela no tojo tsy fahasalamana ity mpanakanto ity. Mbola nanao antso avo ho an’ny tolo-tanana amin’ny fitsaboana azy i Nini Rabary, vadiny, ny sabotsy lasa teo. Nandritra izany no nitondrany fanazavana feno mahakasika ny toe-pahasalaman’i Lalie, tamin’io andro iray nialohan’ny nahalasanany io.
« Niarahantsika nahalala fa nisy ilay kyste ovarien, nodidiana tao amin’ny kibony. Vita soa aman-tsara izany, ka nalefa notiliana ilay izy. Fantatra tamin’io anefa fa misy homamiadana tao, ka mila fanohizana ny fitsaboana. Ankoatra izay, niha nihombo ny aretiny izao ary tsy afa-miresaka izy io, no sempotsempotra. Misy « œdème pulmonaire » ihany koa izy taorian’ireny covid ireny, ka mbola sarotsarotra ny fitsaboana », hoy i Nini, vadiny, nandritra izany.
Indrisy anefa, lavon’ny aretiny ihany i Lalie, na teo aza ny ezaka natao tamin’ny fitsaboana. « Nitsahatra tamin’ny fangirifiriany, ka handry am-piadanana anie izy », hoy ny ankamaroan’ireo naneho alahelo sy fiaraha-miory amin’ny fianakavian’ity mpanakanto ity.
Raha tsiahivina, nisongadina tany amin’ny faramparan’ny taona 90 tany i Lalie. Ilay hira « Miaraka aminao», niarahany tamin’i Do Rajhonson no tena nahafantarana azy voalohany. Nahavita rakikira azy manokana, « Mozika tiako », izay nampiakatra azy teo amin’ny laza i Lalie taorian’izay. Tany amin’ny fampiarahana talenta tamin’ireo namany anefa no tena nampisongadina azy koa, ka anisan’ireny ny « Raha tsy ho ahy », niarahany tamin’i Rija Ramanantoanina, sy ny « Feo roa », nataon’i Lalie sy Nanie. Noho iny feony tsy manam-paharoa iny ihany, maro ireo mpanao dokambarotra no niantso azy. Tsy tazana an-tsehatra fotoana elaela i Lalie, kanefa nanapa-kevitra ny hiverina an-tsehatra kosa ny taona 2023. Nahafaly ny mpankafy izany, ary nahavita seho maromaro izy, nialohan’ny nampihombo ny aretiny.
Zo ny Aina