Mikisaka mianatsimo ilay tangoron-drahona mitondra orambe sy rivotra any avaratry ny Nosy, hoy ny Meteo Madagasikara. Raha ny antontan-kevitra voaray dia mbola tomombana hatrany, amin’ny ankapobeny, ny tontolo hivoarany na dia malefaka aza ny tsiokan’ny talio. Misongadina kosa ny hafanan’ny ranomasina izay manome vahana izany fivoarany izany (28 – 30°C).
Ho betsaka hatrany, araka izany, ny rotsakorana any amin’ ny faritra afovoany sy avaratra atsinanan’ny Nosy hatramin’ ny alakamisy noho ny tanjaky ny varatraza, ka mety hahatratra 40 hatramin’ny 90 mm izany, ao anatin’ny 24 ora.
Mihatra ny filazana fampitandremana miloko mena, ho an’ny faritra Sava sy Analanjirofo ary Atsinanana.
Heverina ny mety hisian’ny fikorontanan’ny asa aman-draharaha andavanandro, fihandronan’ny rano amin’ireo toerana mora tondraka, fiakaran’ny renirano, fihotsahan’ny tany sy ny lalana amin’ireo toerana marefo.
Mikorontana ihany koa ny toetry ny andro any an-dranomasina, any amin’ny morontsiraka afovoany andrefana sy atsimo atsinanan’ny Nosy vokatry ny alondrano ateraky ny varatraza sy ny tsioka atsimo. Hanonja be ary hahery ny ranomasina. Hahatratra 2 hatramin’ny 2,6m ny haavon’ ny onja. Voakasik’izany ny eo anelanelan’Antsalova sy Morombe ary Taolagnaro sy Vohipeno. Hananosarotra ny fifamoivoizana na mety hisy faharendrehana an-dranomasina.
Fampitandremana miloko mena, eo anelanelan’Antsalova sy Morombe ary Taolagnaro sy Vohipeno.
Tatiana A