Nanafika tokantrano iray tany Ampasika Alakamisy ny olon-dratsy miisa telo, ny alin’ny alatsinainy teo. Noratrain’izy ireo ny olon-dehibe miisa telo tao an-trano. Naolan’ireo jiolahy ny tovovavy roa zanaky ny tompontrano. Taorian’ny fikarohana nataon’ny zandary, voasambotra ny olon-dratsy roa.
Notafihin’ny andian-jiolahy mirongo fitaovam-piadiana ny tokantrano iray tany Ampasika, fokontany Ambohibary, kaominina Alakamisy, distrikan’Anjozorobe, ny alin’ny alatsinainy 5 oktobra, tokony ho tamin’ny 8 ora alina tany ho any. Niditra an-keriny tao an-trano ny olon-dratsy miisa telo, nirongo basy sy zava-maranitra. Vantany vao tafiditra, nanambana tamin’ny fitaovam-piadiana ireto farany. Nafatotr’izy ireo ny olona rehetra tao an-trano. Mbola noratrainy koa ny olon-dehibe miisa telo, izay nahitana lehilahy roa (65 sy 46 taona) sy renim-pianakaviana iray 56 taona. Voavely tamin’ ny zava-maranitra teo amin’ny lohany ny rangahy iray. Voakapoka tamin’ny famaky ny kitron-tongotran’ilay rangahy faharoa, raha toa ka voavely tamin’ny baramina ny valahana sy ny tanan’ilay renim-pianakaviana. Rehefa izay, naolan’ireo olon-dratsy ny roa vavy (17 sy 14 taona) zanaky ny tompon-trano. Rehefa avy nahavita ny asa ratsiny sy nandraoka ny entana sarobidy tao an-trano ireo olon-dratsy dia nitsoaka.
Nampandre ny zava-nitranga tamin’ny zandary miasa ao amin’ny zana-tobim-paritra Andonona, omaly 06 oktobra 2026, ny olona tsara sitrapo iray. Tsy niandry ela fa nidina ifotony nijery ny zava-misy sy nanao ny fanadihadiana ny zandary.
Olona roa voasambotra
Taorian’ny fanadihadiana sy ny fikarohana nataon’ny mpitandro filaminana. Olona roa no efa voasambotra tamin’io fanafihana niharo fanolanana io. Voasambotra omaly ireo lehilahy miisa roa,. Anisan’ny nandray anjara tamin’ ny fanafihana izy ireo. Mbola mitohy ny fikarohana ny namany iray izay nandray anjara tamin’izany. Mitohy ny fanadihadiana ny raharaha izay iandraketan’ny zandary ao Anjozorobe.
Mino
French