Nomarihina ny alarobia teo, tetsy amin’ny Parvis Analakely, ny Andro iraisam-pirenena ho an’ny Croix Rouge sy ny Croissant Rouge. 61 taona no nijoroany teto Madagasikara (1963-2021).
“Koloy hiaina ny maha olona”, io ny lohahevitra novoizina nandritra ny fankalazana. Nanasongadinana indrindra ny sehatry ny maha olona sy ny firaisankina ny hetsika izay mifandray indrindra amin’ny andry voalohan’ ny politikam-panjakana rahateo.
Naneho hatrany ny fahavononany amin’ny fiahiana ny maha olona ireo mpilatsaka an-tsitrapo miara-miasa amin’ny Croix-Rouge malagasy. Nampianatra ny fanaovana vonjy aina raha misy loza izy ireo. Nisy ny fijoroana vavolombelona nandritra ny asa famonjena aina …
Maro ireo tranoheva naneho ny asa efa nataon’ny Croix-Rouge sy ny fitantanana ny loza eny ifotony, fiahiana ara-pahasalamana, hetsiky ny tanora, asa an-tsitrapo…
Nisy ihany koa ny fitiliana ny diabeta maimaimpoana sy fanomezan-dra nisokatra tamin’ny rehetra.
Mpiara-miasa akaiky amin’ny BNGRC rehefa misy loza mitranga ny Croix-Rouge ary izy ireo no matetika hita eny an-tsehatra sy fantatry ny rehetra.
Mpirotsaka an-tsitrapo manolo-tanana mandritra ny fisiana loza voajanahary na loza mihatra mandritra ny fihetsiketsehana no tena manamarika ny Croix Rouge.
Tatiana A