Hotanterahina ny 1, 2, 3 novambra izao, any amin’ny Nosy Boraha, ny «Festival des Pirates» andiany faharoa. Hetsika ara-kolontsaina entina hampiroboroboana ny fizahantany sy ny toekarena ao an-toerana. Hisy ny lalao sy fifaninanana, fanentanana samihafa, ary fampisehoana ataon’ireo artista maro mandritra ny telo andro hanaovana ny hetsika. Hampiavaka ny amin’ity taona ity ny “Chasse au trésor” izay mitaky fampiasam-batana sy fampiasan-tsaina ary noho izy sarotra raha oharina ny tamin’ ny teo aloha. «Natao hanampiana ireo hetsika ara-pizahantany misy ao amin’ny Nosy Boraha ataon’ny ministeran’ny Fizahantany sy ny asa tanana ny Festival des Pirates. Ampivoatra ihany koa ireo toerana manan-tantara any an-toerana entina hisarihina ny mpizahatany ny hetsika», hoy i Bosco Totozafy, filohan’ny fikambanana Le circuit de Forban (LCDF) sady mpikarakara ny hetsika. Hiaraha-mahalala, hoy izy, fa mampalaza ny Nosy Boraha ny “Festival des baleines” izay mahasarika ireo mpizahatany saingy telo volana monja ny fandalovan’ireo trozona any an-toerana. Antony nanaovana ny “Festival des Pirates” hampiroboroboana hatrany ny toekaren’ny mponina.
Nahomby ny hetsika “Festival des pirates” andiany voalohany ka anisan’ny nanohana izany ny Orange Madagascar. «Tanjona ny hampiroboroboana ny kolontsaina sy ny toekarana ao amin’ny Nosy Boraha»,hoy ny tomponandraikitry ny Orange Madagascar, Rakotomalala Anita, omaly, nandritra ny fampahafantarana ny hetsika tetsy amin’ny Gara Soarano. Notohizany fa manohana hatrany ny hetsika ara-kolontsaina sy fanatanjahantena ary fizahantany ny Orange Madagascar. Hisy, araka izany, ireo tolotra maro samihafa ataon’ny Orange mandritra ny hetsika.
Henintsoa Hani
French