Pac Mahajanga : “Hoezahina ny hanasaziana ny raharaha kolikoly”

Notanterahina tamin’ny fomba manetriketrika, tao amin’ny Tendrompitsarana miady amin’ny kolikoly (Pac) Maha­jan­ga, ny herinandro teo, ny lanonam-pitsarana nametrahana amin’ny toerany ny lehiben’ny Fampanoavana ambony, Ranorine.
Namelabelatra mazava ity lehiben’ny fampanoavana ambony vao napetraka amin’ny toerana ity ny amin’ireo ki­nasa sy vina ary koa ny paikady hirosoana amin’ny fanatanterahana ny andraikitra lehibe horaisiny, manomboka izao. “Vonona amin’ny lafiny rehetra izahay hiadiana amin’ny kolikoly. Eo ihany koa ny fa­natsarana ny rafitra ara-pitsarana eo anivon’ny Pac, ary ny fametrahana fitokisana azy eo amin’ny asan’ny fampanoavana”, hoy izy tamin’ny lahateniny. Manamarika ny haben’ny andraikitra sahanin’ny fampanoavana ambony, hanamafisana ny lalàna sy hanasaziana ihany koa ireo raharaha kolikoly izany, araka ny nambarany hatrany. “Ady anisan’ny laharam-pahamehan’ny fanjakana sy ny politikan’ny fi­tsarana ny kolikoly”, hoy ihany izy.
Tonga nanome voninahitra sy nanatrika ny lanonana ny minisitry ny Fitsarana, Rakotomandimby Benjamin Alexis, sy ny tonia mpampanoa ambony eo anivon’ny Fitsarana tampony, Andriama­havory Christian Paul. Teo koa ny mpandrindra nasiona­lin’ny Pac, Rivonandrianina Rabarijohn, ary ireo manam-pahefana sy olo-manan-kaja isan-tsokajiny niampy ny avy amin’ireo fiarahamonim-pirenena ao Mahajanga.

Synèse R.