Notokanana ny sabotsy lasa teo ny birao fiasan’ny Prefektiora, ao amin’ny Faritra Ambatosoa. Nantitranterin’ny Filohan’ny repoblika tamin’ny lahateny nataony fa tokony hahaleo tena ny fitantanana.
“Raha nametraka fanamby isika, tratra ny tanjona. Satria mila mahaleo tena eo amin’ny fitantanana ny eto Maroantsetra. Tokony hitondra soa izay”. Io ny nambaran’ny filohan’ny Repoblika, Rajoelina Andry, tany Maroantsetra, Faritra Ambatosoa, afakomaly, nitokana ny birao fiasan’ny prefet sy nametrahana ny prefet vaovao hisahana an’i Maroantsetra sy Mananara Avaratra, Rabefenara Louis Velombita. Hapetraka ao avokoa ny birao rehetra maha Faritra an’Ambatosoa. I Maroantsetra no renivohi-paritra. Noho izany, hapetraka ao avokoa ny fotodrafitrasa rehetra. Anisan’ izany ny biraon’ny prefektiora fa tsy distrika intsony. Ny hetra rehetra miditra amin’ny Faritra manomboka izao hananganana fotodrafitrasa eo an-toerana hanasoavana ny mponina. Dingana iray amin’ny fitantanana manakaiky vahoaka sy fitsinjaram-pahefana tena izy izany.
“Amin’ny maha mitoka-monina antsika satria saro-dalana, nezahina hoe ny aretina rehetra tokony hotiliana sy hitsaboana dia tokony ho vita eto Maroantsetra avokoa”, hoy izy nitokana ny hipotaly manara-penitra. Tsy mila mankany Toamasina na Antananarivo intsony. Misy ny “scanner” raitra dia raitra, ny “générateur d’oxygène”, ny laboratoara fitiliana, ny toeram-pandidiana… Hatao ny fanofanana mpandidy 30 isan-taona alefa any ivelany. Izay miditra ao amin’ ny hopitaly ka tsy salama ka mila fanasitranana na fandidiana dia mba ho sitrana sy ho velona soa aman-tsara.
“Taloha ny mpitondra manao kabary dia lasa mody, fa izaho kosa mifamatotra sy tsy miala aminareo ary hanampy anareo hatramin’ny farany: hanova tanteraka ny tantara sy ny fampandrosoana an’i Maroantsetra”, hoy izy nanolotra ny kianja manara-penitra ao Ambatomasina.
R. Nd.
French