Nitondra tolo-kevitra ho fanatsarana ny lalàm-pifidianana ny eo anivon’ny Kaomity mitandro ny fahitsiana (CSI). Nivoitra tamin’izany ny kolikoly amin’ny fifidianana.
“Rehefa misy mividy olona amin’ny fifidianana na manome vola olona mba hifidy ny tena, mihevitra ny rehetra hoe kolikoly izany. Nefa tsy mbola namaritra ny lalàna hoe kolikoly izany. Tsy mbola misy famaritan’ny lalàna ny kolikolim-pifidianana amin’izao fotoana izao”. Io ny nambaran’ny filohan’ny Kaomity mitandro ny fahitsiana (CSI), Andriamifidy Jean Louis, nitondra tolo-kevitra folo hanatsarana ny lalàm-pifidianana teny amin’ny Ceni, Alarobia, omaly. Matetika, hosoka amin’ny fifidianana ny zava-misy. Mateti-pitranga koa ny fampiasana fitaovam-panjakana. Fandikan-dalàna amin’ny fifidianana izay, nefa tsy azon’ny Bianco ny manao famotorana azy. Rehefa hazavaina izay fa misy ny fandikan-dalàna amin’ ny fanaovana kolikoly izay voafaritry ny lalàna momba ny ady amin’ny kolikoly, azon’ny Bianco anaovana famotorana.
Fividianana vato amin’ny fifidianana
Ny fividianana vato no tena mateti-pitranga amin’ny raharaham-pifidianana: “Ity ny vola dia fidio aho”. Izay matetika no atao hoe kolikoly, mitarika ny CSI hoe: aleo tena holazaina fa kolikoly izay tranga izay. Mba hahazoana manasazy mafimafy kokoa sy manenjika henjankenjana kokoa izay manao azy. Anisan’ny tolo-kevitra naroson’ny CSI koa ny hanatsarana sy hanamafisana ary hanafainganana ny fomba fitoriana amin’ny raharaham-pifidianana. Somary manahirana ny olona amin’izao fotoana izao ny fomba ahazoana mitory sy mitondra porofo. Eo koa ny fe-potoana itondrana an’izany, izay metetika fohy tsy ahazoan’ny olona manatanteraka izay angatahina aminy.
Mamaritra, ohatra, ny paikadim-pirenena fa zava-dehibe hotratrarina ny ady amin’ny tsimatimanota. Tanteraka ve izay amin’ny fifidianana ?
R. Nd.
French