Naneho hetsika teny By Pass ireo ben’ny Tanàna miisa 26 avy eny amin’ny distrika Atsimondrano. Tanjona ny hampiroboroboana ny fihavanana eo amin’izy ireo sy hanampiana ireo fianakaviana sahirana amin’izao fidiran’ny mpianatra izao. Nambaran’ny filohan’ny Antenimierandoholona, fa zava-dehibe ny fihavanana amin’ny fampandrosoana.
Noraisin’ny filohan’ny Antenimierampirenena, Tokely Justin, teny Ivato, ny sekretera jeneralin’ny Forum parlemantera FP – Sadc, Boemo Sekgoma, ny herinandro teo. Nivoitra tamin’ny resaka ny fanatanterahana ny fihaonana an-tampon’ny Sadc. Teo koa ny sonia fifanarahana eo amin’i Madagasikara sy i Maorisy momba ny fanovana ny FP-Sadc ho Parlement régional.
Kandidà voalohany nilaza hofidina ho filoham-pirenena amin’ny 2028 ny ben’ny Tanànan’Imerintsiatosika, Andriambolanarivo Parisoa. Nilaza ho vonona amin’ izany ity tanora 34 taona ity. Anisan’ny politika hampihariny ny fampihavanana hiarahana mampandroso an’i Madagasikara. Nambarany fa nahitany fahombiazana izany tamin’ny fitantanany.
Mitaky ny hanajana ny sata mifehy ny Sadc ny filoha teo aloha isany, Ravalomanana Marc sy Rajaonarimampianina Hery, araka ny fanambaran’izy ireo. Eo ny tokony hanajana ny fahalalahana maneho hevitra sy ny fahaleovantenan’ny Rafitra mikarakara fifidianana ary ny ady amin’ny kolikoly. “Tsy tokony hisy ny fanampenam-bava”, hoy izy ireo.
French