Hitana ny sain’ny rehetra, indrindra ny mpankafy baolina kitra, amin’ity anio ity, ny ampahefa-dalana hiadiana ny ho tompondakan’i Afrika, ho an’ireo mpilalao tsy matihanina (Chan 2025). Hifampitana ny Harambee Stars Kenya sy ny Barean’i Madagasikara. Fihaonana hotanterahina ao amin’ny Kianja Kasarani stadium, Nairobi Kenya. Nambaran’ny mpanazatra, Rakotondrabe Romuald (Rôrô), fa tsy mora ny lalao hifanandrinana amin’i Kenya, izay ekipa matanjaka ary manana lenta ambony. Ankoatra izay, hilalao eo amin’ny kianja mahazatra azy sy manoloana ny mpijeriny izy ireo. “Ho toy ny famarananakely amin’ity Chan 2025 ity ny lalaon’ny roa tonta”, hoy izy nandritra ny tafa tamin’ny mpanao gazety, omaly alakamisy. Nomarihiny kosa fa vonona ny Malagasy mpilalao ary mitovy ny herijika handrombahan’ny roa tonta fandresena.
Mahakasika ny toetr’andro indray, nambaran’ny mpanazatra fa mety tsara amin’ny mpilalao satria mitovy amin’ny eto Madagasikara, ary efa nisy efatra andro nizarana izany ka tsy mametraka olana. Nilaza ny fahavononany hidona amin’i Kenya ihany koa i Tony, kapitenin’ny Barea. Nitsapa ny kianja tao Kasarani stadium ireo mpilalao, omaly. Tsiahivina fa anio amin’ny 5 ora folakandro ny fihaonan’ny Harambee stars sy ny Barean’ i Madagasikara.
Tompondaka
French