Notanterahina tany Angola, ny 15 hatramin’ny 17 aogositra lasa teo, ny fiadiana ny tompondakan’i Afrika, taranja Surf. Tsy nanana solontena tamin’ izany i Madagasikara saingy tonga tany an-toerana kosa ny filohan’ny Federasiona malagasin’ny Surf no sady Filoha lefitra kaonfederasionina Afrikanina ny Surf, i Roger Fostinato. Nitondra fanazavana mahakasika ny tsy nahafahana nitondra atleta izy ka nilaza fa efa nanao fangatahana fanohanana ara-bola izy ireo saingy tsy nivaly. Tsy nanana solontena, araka izany, i Madagasikara. Na izany aza, nisy ny fifampiresahana natao tany an-toerana ka nivoitra tamin’izany fa tokony ho afaka mandray fifaninanana iraisam-pirenena amin’ny taranja Surf i Madagasikara, araka ny nambaran’ny filohan’ny Kaonfederasiona Afrikanina ny taranja Surf. Anisan’ny afaka hatao eto Madagasikara ny fiadiana ny tompondakan’i Afrika sy ireo fifaninanana iraisam-pirenena fanao eto Afrika isan-taona. Notsiahivin’ity filohan’ ny federasionina malagasy ity fa nahavita nikarakara fifaninanana 3 tao anatin’ny taona ny kaonfederasionina Afrikanina tamin’ny taon-dasa. Manana toerana sy atleta manana ny maha izy azy eo amin’ny taranja Surf i Madagasikara hahafahana mandray izany fifaninanana iraisam-pirenena izany. Mila fifanohanana anefa izany, eo amin’ny fanjakana, ny mpanohana ary ny mpisehatra rehetra eo amin’ity taranja ity.
Mi.Raz
French