Hotanterahina etsy amin’ny Kianja Makis Andohatapenaka, rahampitso, ny dingana manasa-dalana hiadiana ny amboaran’i Madagasikara, taranja rugby na «Top 8 Mada». Anisan’ny fihaonana andrasan’ny rehetra ny fifandonan’ny TFA Anatihazo sy ny FTM Manjakaray. Hiendrika famaranana kely ny an’ny roa tonta. Adin’ny samy kartie mantsy io ary ekipa diso mifankahalala tsara ireo hifanandrina. Amin’ ity, hanala vela amin’ny Manjakaray ry zalahy Anatihazo.
Samy manana ny fahaiza-manaony na ny FTM na ny TFA ary samy misy mpilalao tanora kinga sy havanana, saingy manatombo kely eo amin’ny traikefa amin’ny fiatrehana lalao goavana ny Manjakaray. Heverin’ny rehetra ihany koa fa lalaon’ny mpanazatra ny azy ireo. Mbola fihaonana goavana ihany koa ny fihaonan’ny Cosfa (Bebaoty) sy ny Tam Anosibe. Lalaon’ny kartie sy boaty ny azy ireo. Samy tompon’ny tanjaka ka ho resy izay ratsy fanomanana amin’ity. Ambony amin’ny ara-taratasy anefa ny Bebaoty saingy manana ilay toe-tsaina vonon-kandresy sy hifono vy ny mpilalaon’Anosibe.
Ankoatra izay, hotontosaina amin’io ihany koa ny ankatoky ny famaranana, sokajy vehivavy. Hanokatra izany ny an’ ny RCTS Soavimasoandro sy ny FTM Manjakaray ary ny SCB Besarety sy ny FTFA Antohomadinika (Atômika). Fihaonana hangotraka tokoa satria hanala vela ry zareo Atômika.
Tompondaka
French