Nitondra fanazavana ny momba ny fanatanjahantena sy ny lafiny kolontsaina ny praiministra Ntsay Christian, omaly, tamin’ny fananganan-tsaina teny Mahazoarivo. « Tsy kisendrasendra no nahazoana fahombiazana tahaka izao, ka isaorana ny filohan’ny Repoblika, Rajoelina Andry, amin’ ny vina ananany momba ny tanora sy ny fanatanjahantena. Eo koa ny fanohanany manokana ny Barea hatramin’ny taona 2019 ka nahazoana vokatra miabo hatrany », hoy izy. Nanterin’ny lehiben’ny governemanta fa tanjona ny hahazoan’ny Barea ny amboara kaontinantaly amin’ny lalao baolina kitra. Vonona hanohana izany hatrany ny governemanta, araka ny nambarany. Reharehan’i Madagasikara sady faniriana no efa nandrasan’ny vahoaka malagasy hatrizay ny ahazoana vokatra tena tsara toy izao. « Isaorana ireo mpikarakara rehetra manomboka amin’ny Federasionin’ny baolina kitra, ny mpanazatra, ny mpikarakara ara-teknika, ny mpilalao, ny mpanohana rehetra tsy ankanavaka ary ny vahoaka », hoy izy.
Ankoatra izany, fotoana koa omaly natokan’ireo ekipa mpanao fanatanjahantena eto anivon’ity Andrimpanjakana ity hanaovana tatitra sy hanolorana amin’ny praiminisitra ireo amboara azo nandritra ny fandraisana anjara nataon’izy ireo tamin’ny lalao 2025 nokarakarain’ny Asief tany Mahajanga. Nankasitraka izany koa ny tenany, ary nisaotra ny mpiara-miasa rehetra eny Mahazoarivo tamin’ny fanohanana ireo atleta nandray anjara.
Nambarany tamin’ny lahateny nataony ny momba ny fiverenan’ny Kabeson’ny Ampanjaka Toera sy ireo mpitari-tafika roa eto an-tanindrazana amin’izao fotoana izao. « Zava-dehibe amintsika ny manohy hatrany ny fametrahana sy famelomana ny tantara eto amin’ ny firenena. Manetsika mandrakariva ny hambom-po sy ny fitiavan-tanindrazana, ary fiombonan’ny Malagasy ao anatin’ny fahasamihafana izany », hoy izy.
Synèse R.
French