Hiditra amin’ny dingana faharoa ny tetikasa Mionjo, iarahana amin’ny minisiteran’ny Fitsinjaram-pahefana sy ny fanajariana ny tany (MFFT). Notanterahina tetsy Anosy, araka izany, ny atrikasa famintinana sy fandravonana ity tetikasa fampandrosoana eny ifotony ity. Niara-nifanotrona tamin’izany ireo solontena avy amin’ny Andrimpanjakana, ireo mpiara-miombon’antoka ara-teknika ary ny solontenan’ny vondron’ny fiarahamonim-pirenena.
Nambaran’ny eo anivon’ny MFFT fa tanjona amin’izao fihaonana izao ny famintinana sy ny nandravonana ny fitsidihana natao teny anivon’ny kaominina sy ny atrikasa isam-paritra notanterahina tany amin’ny faritra Anôsy, Androy ary Atsimo-Andrefana. «Nifampizarana tamin’izany ny traikefa niainana teny ifotony sy ny fanazavana ara-teknika ary ny paikady. Hahafahana mamantatra ny vokatra efa azo, ny fomba fanao tsara ary ny fepetra ilaina hahombiazana ho amin’ny fampandrosoana eny ifotony », hoy ny avy amin’ny minisitera.
Nisongadina tamin’izany koa ny lanjan’ny fandraisan’anjaran’ny vondron’ny fiarahamonim-pirenena, ny filana mampifanaraka ny asa amin’ ny zava-misy eo an-toerana ary ny fanamafisana ny fahaiza-manao eo amin’ny Andrimpanjakana, mba hahazoana antoka fa haharitra ny vokatra.
Tsiahivina fa mikendry ny hanamafy ny fizakan’ny mponina any atsimon’ny Nosy ny tetikasa Mionjo, amin’ny alalan’ny fampiasam-bola amin’ny fotodrafitrasa maharitra izao atao izao. Eo koa ny fanohanana ny fivelomana maharitra ao anatin’ny fomba fiasa mirindra sy miara-miasa amin’ny sehatra maro. « Fototra entina hanomanana ny dingana faharoa amin’ny tetikasa Mionjo ny torolalana sy ny fehin-kevitra nivoaka tamin’ity atrikasa ity », hoy ny eo anivon’ny MFFT.
Synèse R.
French