Hanamarika ny faha-30 taonany ny alakamisy ho avy izao ny Fandaharanasa iraisam-pirenena ho an’ny tanora na ny Programme d’action mondial pour la jeunesse. Hotanterahina any New York ny fotoam-pankalazana. Nahazo fanasana manokana amin’izany ny filoham-pirenena, Rajoelina Andry.
Nahazo fanasana manokana amin’ny fankalazana ny faha-30 taon’ ny Fandaharanasa maneran-tany ho an’ny tanora na ny Programme d’action mondial pour la jeunesse (PAMJ) eo anivon’ny Firenena mikambana (ONU), New York, Etazonia, amin’ny 24 septambra ho avy izao ny filohan’ny Repoblika, Rajoelina Andry. Ao anatin’ny fandaharam-potoana ary anisan’ny mampiavaka ny fivoriambe faha-80 ataon’ ny ONU amin’izao faha-80 taona niorenany izao izany. Tanora malagasy dimy mianadahy no voafantina hiatrika izany, hitondra ny feon’ny tanora malagasy.
Anisan’ny laharam-pahamehan’ny fitondrana ny fanomezan-danja ny tanora, andry fototra amin’ny fampandrosoana: fanomezan-danja ny maha olona. Tsy mijanona ho politika misoratra fotsiny izany, fa napetraka ny tetikasa sy asa hanohanana ny tanora ho mpandray anjara feno amin’ny fampandrosoana. Anisan’izany, ohatra, ny famatsiam-bola ny tanora mpandraharaha sy ny fampanana asa amin’ny tetikasa Fihariana, araka ny fanazavan’ny minisitry ny Tanora sy ny fanatanjahantena, i Abdulah Marson Moustapha, ny faran’ny herinandro teo, no anisan’ny nanasana azy manokana. Eo ny naneken’ny fitondram-panjakana ny handraisan’i Madagasikara ny fihaonamben’ny tanora afrikanina lehibe indrindra amin’ ny faran’ny volana novambra. Eo koa ny fanaovana ho vaindohan-draharaha ny maha olona sy ny tanora: ny fanamboarana fotodrafitrasa tranon’ ny tanora, ohatra.
Reharehan’ny Malagasy rehetra ary tokony hampiakatra ny hambompon’ny tena ny fananana filohan’ny Repoblika hoe ny ONU no nisafidy azy mba ho anisan’ireo olom-panjakana nasaina amim-boninahitra amin’ny fananany haitarika sy ny fampiroboroboana ny tanora, araka ny nambarany.
R. Nd.
French