Iray tamin’ireo voaroba, ny harivan’ny alakamisy teo, ny fivarotam-boky Lecture & loisirs, etsy amin’ny Tanà Water Front Ambodivona. Nanameloka ny ankasomparana miendrika fandrobana izay natao tamin’ny namany ny fikambanan’ny mpivaro-boky eto Madagasikara (AEdiM). « Melohinay ny fandrombana nahakasika orinasa maro, izay manampy trotraka ny fiainana andavanandro efa mahakivy ny tsirairay. Voatohintohina tanteraka ny fanovozam-pahalalana, kanefa ny kolontsaina no fototry ny firenena, ary andry lehibe amin’izany ny mpivaro-boky », hoy ny fanambarana nataon’ny AEdiM, nosoniavin’ny filohany, Razafintsalama Marie Michèle.
Tsy ny Lecture & Loisirs ihany no lasibatry ny famotehana. Teo koa ny toeram-pampirantian’i Pierrot Men, izay teo akaiky teo. Vao avy nohavaozina ny volana avrily lasa teo ity toeram-pampirantiana ity. Saripika feno talenta maro no tsy hita popoka na ravan’ny afo tao. Tsy hita tombanana ara-bola ny fahavoazana, satria zavakanto sy kolontsaina no resaka. Manampy trotraka ireo mantsy ny Cinépax teo anilany, izay toerana manara-penitra ho an’ny sarimihetsika. Hany toerana mba nahafahana nijery sarimihetsika anaty efitrano koa izy ity. Enga anie ka ho tapitra hatreo…
Zo ny Aina
French