Nifampidinika tetsy Anosy, omaly, ny avy ao anivon’ny Sampandraharaha misahana ny Fanajariana ny tany sy ny sampandraharaha misahana ny fananantany eo anivon’ny minisiteran’ny Fitsinjaram-pahefana sy ny fanajariana ny tany (MFFT) .
Voaresaka tamin’izany ny olana atrehin’ny tanàn-dehibe. Nambaran’ireo tomponandraikitra tamin’izao atrikasa izao fa anisan’ny tanjona ny hanitarana ny fanamarinana sy fanomezana ara-dalàna ny taratasin-tany. « Tsy ho voafetra intsony amin’ny tranga mifandray amin’ny tetikasa na fanesorana an-keriny ihany izany. Hatao ho fomba fanao hentitra sy maharitra izany ary ezahina hamaliana mivantana ny filàn’ny mponina eny an-tanàn-dehibe », hoy izy ireo.
Etsy andaniny, nifampidinihana tamin’izany koa ireo olana atrehin’ny tanàn-dehibe amin’ny resaka fananantany. Niaraha-nandroso ny vahaolana azo vinavinaina. Niaiky kosa anefa ireo tomponandraikitra fa tena samihafa amin’ny zava-misy eny ambanivohitra ny eny an-tanàn-dehibe. « Mitaky fepetra manokana sy fomba hafa ny raharaha momba ny fananantany ho an’ny eny an-drenivohitra », hoy ihany izy ireo. Dingana manaraka kosa, aorian’izao, ny fametrahana faritra andrana sy ho filamatra natao hiasana sy hanamarinana ireo fomba vaovao mialoha ny hampiharana azy amin’ ny sehatra mivelatra kokoa.
Tsiahivina fa efa nisy fivorina natao tamin’ny andiany voalohany mba hamantarana ireo olana samihafa sy handrafetana ny vahaolana mifandraika amin’izany.
Synèse R.
French