Anisan’ireo noraisin’ny filoha Rajoelina Andry, teny Iavoloha, ny sabotsy teo, ny filohan’ny Holafitry ny mpanao gazety (OJM) sy ireo birao Analamanga ary ireo filohan’ny fikambanana mpanao gazety maromaro, toy ny CJD, Appel, FMGKriMa, Chanut Mada, AJJM.
Voaresaka ny maharary ny asa fanaovan-gazety ka anisan’ ny fanatsarana nampanantenain’ny fitondram-panjakana ny hanokafana ny loharanom-baovao eo anivon’ny minisitera rehetra. Hohatsaraina ny sata maha mpanao gazety ka hosokafana ny fifampidinihana marolafy ny amin’ny hananganana ny tsanganasa na ny « Corps du métier de journaliste ». Hanomezana lanja sy hamerenana amin’ny hasiny ny asa fanaovan-gazety izany.
Hozaraina fanamiana mitovy, famantarana manokana ny maha mpanao gazety azy « Gilet de presse » misy numéro matricule OJM sy tsy azo ifandimbiasana ny mpanao gazety. Tafiditra amin’ny fiarovana azy sy hanamorana ny fahazoan’ny mpanao gazety ny vaovao eny anivon’ny loharanom-baovao na hetsika izany. Tsy voatery itakiana taratasy fanasana azy koa anefa ny mpanao gazety.
Etsy andaniny, hohamafisina ny fampiofanana ny mpanao gazety manerana ny faritra. Havoaka ny didim-panjakana hisitrahan’ny mpanao gazety ny tsy fandoavana hetra momba ny fanafarana fitaovana manokana iasana, ilaina amin’ny asa fanaovan-gazety. Hohatsaraina ny lalàna momba ny gazety ana habaka « Presse en ligne », hampiavaka ireo orinasan-ga-zety sy ireo mpanao gazety ana habaka, amin’ireo mpikirakira tambazotra sosialy sy ireo pejy tantanan’olon-tsotra.
Synèse R.
French