Nitafa mivantana tamin’ny vahoaka malagasy indray ny filohan’ny Repoblika, Rajoelina Andry, halina. Mifamahofaho ny raharaham-pirenena. Mitohy kosa ny fanomanan’ny FFKM ilay fikaonandoha itadiavam-bahaolana…
Misoko mangina izy ireo na eo aza ny hiakan’ ireo eny an-kianja. Manohy hatrany ny fifampiresahana amin’ireo ankolafin-kery ny eo anivon’ny FFKM.
Anisan’ireo efa noraisin’ ireo filoham-piangonana efatra mirahalahy ny Firenena mikambana (Pnud-ONU). Teo koa ny fihaonan’izy ireo amin’ ny antoko politika na koa ny fiarahamonim-pirenena, ny herinandro teo. Nandray ny avy amin’ny Capsat koa ireo filoham-piangonana. Manampy izany ny fihaonan’ny FFKM tamin’ny Praiminisitra, Zafisambo Fortunat.
Ao anatin’izany rehetra izany, hitohy anio, ny fihetsiketsehana etsy amin’ny Kianjan’ny 13 mey. Anisan’ny hatao amin’izany ny fitetezana ireo minisitera hakana ireo mpiasam-panjakana, ankoatran’ny fahatongavan’ireo sendikà efa nanao izany, omaly. Teo koa ny nanaovam-beloma farany ny nofo mangatsiakan’i Safidy, mpitolona lavo ny alahady teo.
Ankoatra izany, tonga teny Iavoloha, nijery ny zava-misy ireo manamboninahitra avy amin’ny Etamazaoron’ny Tafika. Nandeha tam-pirahalahiana ny fijerena izany teo amin’ny tomponandraikitry ny lapa sy ireo iraka manokana. Anisan’ny nataon’izy ireo ny fanisana ireo fitaovana toy ny fiara, moto sns… teny an-tokotany satria mba hisorohana ny fandrobana. Efa tsy eny an-toerana ny filoha Rajoelina Andry.
Efa tsy eto an-tanindrazana ny filoha Rajoelina
Voalazan’ny vaovao any ivelany fa nandao an’i Madagasikara ny alahady teo ny tenany tamin’ny alalan’ny fiaramanidin’ny Tafika Frantsay no namoahana azy niala teto rehefa nahazo ny fankatoavan’ny filoha Frantsay, Emmanuel Macron. Nihazo ny Nosy Maorisy ary lasa any Dubaï – Émirats Arabes Unis, taorian’ izany.
Nihemotra hatrany kosa ny fotoana nandefasana ny lahateniny tao amin’ny TVM/ RNM. Nambara fa tokony ho tamin’ny 7 ora hariva, saingy efa nisy andiana miaramila niatrana tetsy Anosy. Natao ny fifampiraharahana ka nahemotra amin’ny 8 ora sy sasany, nefa nambara ho mbola anaty fifampiraharahana indray. Niafara tamin’ny filazana fa nalefan’ny miaramila nody ireo mpiasan’ny TVM/RNM tokony handefa ny horonam-peo sy ny sary.
Etsy andaniny, andrasana ny fivorian’ny depiote eny Tsimbazaza, anio. Araka izany, eo aloha izany izao ny toe-draharaham-pirenena.
Synèse R.
French