“Tsy miala amin’ny hetahetam-bahoaka ny soso-kevitra. Mizara dingana telo lehibe izany farafahakeliny”, hoy ny fanazavan’ny filohan’ny Filankevitra ambony miaro ny demokrasia sy ny fanjakana tan-dalàna (HCDDED), Ranadialison Angelo. Taorian’ny fitsidihana ara-pomba fifanajana tamin’ny filohan’ny Fanavaozana ny Repoblikan’i Madagasikara, ny Kly Randrianirina Michaël, teny amin’ny Lapam-panjakana Iavoloha, tamin’ity herinandro ity no nanambarany izany. Voalohany amin’izay soso-kevitra izay ny fihaonambem-pirenena. Ny tena tsara: miainga ifotony izany. Mahasahana ny ampahany betsaka amin’ny vahoaka malagasy. Miainga any amin’ny kaominina, ohatra, miakatra amin’ny distrika sy ny faritra ary mipaka amin’ny renivohitr’i Madagasikara. Mila fotoana lava sy enti-manana izany. Ny fanjakana no mahafantatra izay hoenti-manana hikarakarana an’izay fihaonambem-pirenena izay.
Ny dingana faharoa, rehefa voaangona ny antontan-kevitra: izay no havadika ho volavolan-dalàna. Na lalàmpanorenana izany na lalàna hafa, izay miteraka olana eto amin’ny tany sy ny fanjakana: ny lalàm-pifidianana, ohatra. Fanovana no notakina teny an-kianja. Ny dingana farany, ny fiatrehana fifidianana. Raha ny tokony ho izy: ny fitsapan-kevibahoaka no manomboka azy. Satria ny lalàmpanorenana no fototra iaingan’ny lalàna rehetra ampiasaina eto amin’ny firenena. Amin’ny maha rafitra mahaleo tena ny HCDDED, vonona hanolo-tanana ry zareo amin’ ny fikarakarana ny dingana hamahana ny krizy.
R. Nd.
French