Miantso fanarahan-dalàna ny minisitry ny Atitany sy ny fitsinjaram-pahefana, Rakotonandrasana Velonjara Tiaray. “Tokony hanara-dalàna isika amin’ ny toerana sasantsasany amin’ireo ben’ny Tanàna sy lehibem-pokontany, misy korontana na fisavorovoroana kely”, hoy izy.
Hentitra ny mpanolotsaina avo eo anivon’ny Fiadidiana ny Fanavaozana ny Repoblika, ny Kly Rabearimanana Lucien. Mitaky fiovana toe-tsaina ny fanovana, araka ny nambarany. « Fanovana hatrany ifotony sy hatrany amin’ny fakany ny fanorenana ifotony. Mitaky andraikitra izany. Eo ny fiovana toe-tsaina sy ny fomba fijery », hoy izy.
Fampahatsiahivan’ny Ceni. Afaka misoratra anaty lisi-pifidianana ireo mpifidy, manomboka ny
1 desambra ho avy izao. Tafiditra amin’ny fanavaozana isan-taona ny lisi-pifidianana izany. Tsiahivina fa mbola manohy ny asany ireo mpikambana eo anivon’ ny Ceni sy ireo rantsamangaikany amin’izao fiovan’ny fitantanana ny firenena izao.
Anisan’ireo nihaona tamin’ny iraky ny Vondrona afrikanina (UA) ny HVM. Nambaran’izy ireo fa nataon’ny mpitondra teo aloha ampihimamba sy nanjakan’ny gaboraraka ny fitantanam-bolam-panjakana sy ny seha-pihariana samihafa. Niantso koa izy ireo mba hanala ny fampiatoana sy ny sazy ho an’i Madagasikara ny avy amin’ny UA.
French