Mpanakanto marolafy. Zanak’i Donné, mpikambana ao amin’ny tarika Randria Ernest, no tena nahafantarana an’i Rayhas Randriamanantena. Nanokatra ny lalany teo amin’ny fitrandrahana ny tsenan’ny zavakanto iraisam-pirenena izany, satria ankoatra ny maha mpihira sy mpitendry karazan-javamaneno azy, manan-talenta manokana amin’ny fandihizana sy ny famoronana sora-dihy koa izy. Anisan’ireo voafidy hisolo tena an’i Madagasikara, mandritra ny andiany fahafito amin’ny “Festival International Sagam”, hetsika ho an’ny soradihy aty amin’ny faritry ny ranomasimbe Indianina, izay tontosaina manomboka anio, any amin’ny Nosy Maurice, hatramin’ny 23 novambra izao, izy.
“Salegy sega”. Sanganasan’i Rayhas, no hasehony mandritra ny seho handraisany anjara. Araka ny anarany, fampivadiana ny salegy, mozika, gadona ary dihy tena malagasy, amin’ny sega izy ity. Niarahan’ity Malagasy mpanakanto ity niketrika tamin’ny Cie SR Dance, ka nanome ny soradihy vaovao. Hisy ihany koa ny atrikasa ho an’ireo ankizy sy tanora maorisianina, hampitan’i Rayhas amin’izy ireo ny traikefany amin’ny dihy nentim-paharazana malagasy.
Zo ny Aina
French