Voatendry ho prefen’ny Polisy Antananarivo, Rajafetra Abraham Setraniaina Solomanjaka, araka ny filankevitry ny minisitra teny Iavoloha, afakomaly, nampitain’ny eo anivon’ny Fiadidiana ny Fanavaozana ny Repoblika, omaly. Araka izany, nesorina amin’ny toerany ny Jly Ravelonarivo Angelo, izay efa nifona ampahibemaso tamin’ny tsy fanokafana an’Ambohijatovo nanomboka ny 25 septambra. Vao mainka nampitombo sy nanamafy ny fitakiam-bahoaka izany? Administratera sivily andiany faha-24, nivoaka tamin’ny Enam, ny prefen’ny Polisy vaovao. Efa sekretera jeneralin’ny minisiteran’ny Atitany izy teo aloha, sekretera jeneralin’ny minisiteran’ny Tontolo iainana ihany koa.
Ho fampiharana ny politikan’ny fitsitsiana sy hialana amin’ny fandaniana mihoapampana, tapaka fa hataon’ny minisitera tsirairay ny fitokanana zava-bita: tsy voatery miandry ny filohan’ny Fiadidiana ny Fanavaozana. Nosoloina avokoa ireo lehiben’ny distrika enina, Antananarivo Renivohitra. Nisy koa, ohatra, ny famindram-pitantanana ny fiadidiana ara-teknika ny tetikasa Miami, Toamasina, eo anivon’ny minisiteran’ny Fizahantany sy ny asa tanana. Ny famindram-pitantanana ny fiadidiana ny Kianja Barea eo anivon’ny minisiteran’ny Tanora sy ny fanatanjahantena. Noraisina ny didim-panjakana mametraka ny rafitra sy ny fandidiana ary ny andraikitra sy ny fahefan’ny fokontany. Notendrena ho sekretera jeneralin’ny minisiteran’ny Serasera sy ny kolontsaina Rasolofoarijaona Miary, ho tale jenerelin’ny ORTM i Lemana Nalimbinjanaharin’Ainasoa Festin Elisée, ho talen’ny RNM Rasoloarison Harimbola Monica ary ho talen’ny TVM, Randrianiaina Miorahasina Lorah.
R. Nd.
French