Mahazo vahana ny slam. Hita sy tsapa tamin’ny fanombohan’ny “Festival Madagaslam” ny faran’ny herinandro teo izany, izay hitohy hatramin’ny 6 desambra. Hiavaka ao anatin’izay ny “3 mn”.
3 minitra. Mety ho kely amina fotoana hafa, fa mahavita hampitana hevitra maro kosa ho an’ny mpahay kanto. Hampiavaka ny herinandro faharoa amin’ny “Festival Madagaslam” andiany faha-16 ny hetsika “3 mn”, izay hotontosaina ny zoma 28 novambra izao, manomboka amin’ny 6 ora hariva, eny amin’ny G&V Inn Andrefan’Ambohijanahary. Tsotra kely ny fandraisana anjara: tsy misy mihoatra ny 3 minitra izay homanin’ ny mpanakanto. Azo atao avokoa na slam-poezia, hatsikana, dihy, teatra, mozika, sns, na mifangaroharo ao aza ireo zavakanto, rehefa tsy midila ny 3 minitra, fotsiny.
Ny Impro Gasy no mikarakara ity hetsika amin’ny zoma ity, izay natao indrindra koa hanasongadina ny famoahana aingam-panahy tsy nomanina, mba hanomezana tsiro hafa kokoa ny famoronana. Izay indrindra rahateo no tena herin’ny slam, ankoatra ny filalaovana ny teny sy ny lohahevitra.
Mandritra io fotoana io no handray anjara ihany koa i Raspyek. Izy ilay mpanao slam avy any Seychelles, vahinin’ ny “Festival Madagaslam” amin’ity. Mbola hisy ny atrikasa iarahana amin’ity vahiny ity, izay hihaonany amin’ireo namany mpanao slam eto Madagasikara. Mahakasika ny vahiny ihany, ho avy eto ihany koa ilay frantsay mpanao slam, Nico K, izay hiray sehatra amin’ i Orag, tompondakan’i Madagasikara, ny 5 desambra izao.
Tsiahivina fa hotontosaina ny 6 desambra izao kosa ny famaranana ny fifaninanam-pirenena ho an’ny slam. Ho vory eto avokoa ireo solontena isam-paritra, hifaninana mba hibata ny amboara, hitondra ny anaram-boninahitra tompondakan’i Madagasikara, ka hisolo tena antsika amin’ ireo fifaninanana iraisam-pirenena.
Zo ny Aina
French