Tsy manam-paharoa maneran-tany ny gadona tsapiky. Feno ny fepetra nandraisan’ny Unesco azy, ho harembakoka tsy azo tsapain-tanana ho an’ny zanak’olombelona.
Dingana goavana ho an’ ny zavakanto sy ny kolontsaina malagasy. Voasokajy ho anisan’ireo harembakoka tsy azo tsapain-tanana ho an’ny zanakolombelona eo anivon’ny Unesco ny gadona tsapiky. Fantatra io nandritra ny fivoriana faha-20 nataon’ny Komity iraisan’ireo governemanta natao omaly 10 desambra 2025, tany New-Dehli, Inde. « Miavaka maneran-tany ny kolontsaina malagasy, izay singa mampitombo ny maha izy an’i Madagasikara sy hahafantaran’izao tontolo izao azy », hoy ny fanambarana nataon’ny minisiteran’ ny Kolontsaina sy ny serasera, izay nanao adisisika tamin’
ny fampidirana izany. Mbola manaporofo ny fanomezan-danja ny kolontsaina malagasy mantsy izany, taorian’ny fampidiran’ny Unesco ny fahazai-manaon’ny Zafimaniry, ny kabary ary ny hiragasy.
Ny faritra Atsimo Andrefana no nihavian’ny gadona tsapiky. Nifototra tamina mozika nentim-paharazana izy io, izay nahitam-pivoarana taty amin’ny taona 1970 rehefa nahazo laka ny zavamaneno maoderina mandeha amin’ny herinaratra, toa ny gitara maranitra sy ny gitara beso ary ny amponga maroanaka. Lasa izay rahateo ny lasitra nahafantaran’ny maro azy, ka nahatonga ny tsapiky malaza maneran-tany. Maro ireo mpikaroka momba ny mozika, vahiny sy malagasy, no efa namoaka voka-pikarohana momba ny tsapiky. Nidina ifotony, nanadihady sy nitrandraka ny momba ity gadona ity sy ny kolontsaina manodidina azy izy ireo. Ny nitovian’ ireo voka-pikarohana: mozika mampihetsika, hiaingam-pigadona ary natao handihizan’ny mpianakavy ny tsapiky.
Tany amin’ny taona 1995 tany kosa anefa vao tena tafakatra taty anivontany ny lazan’ny tsapiky, ary vetivety dia nivoaka hatrany ivelany. Anisan’ny nitondra avo izany ireo mpanakanto avy any Atsimo Andrefana, nandalo tao amin’ny Studio Mars, toa an-dry Tirike, Tearano, Terakaly, Mamy Gotso, Rasoakininike, sns. Nialoha ireo anefa, efa nitrandraka izany ry Damily, Jean Piso, Boloko, sns. Lalaovina amina karazan-danonana maro ny tsapiky, hatrany amin’ ny fianjahana any ambanivolo any. Tsy lavitra an’ity gadona ity teo ny kininike sy ny minotsike, karazan-dihy miaraka aminy.
Zo ny Aina
French