Niditra an-tsehatra koa. Nanambara ny eo anivon’ny Komity nasionalin’ny fikaonandoham-pirenena ho an’ny mpino miozolomanina (KN-FPMM) fa hanolotra ny fehin-kevitra koa izy ireo amin’ny fikaonandoha hatao eto amin’ ny firenena. Efa nanao ny fikaonandoha-paritra izy ireo, omaly, ary hatao ny 20 sy 21 desambra eny Andohatapenaka kosa ny fikaonandoha nasionaly. « Tafiditra ao anatin’ny dingana ho amin’ny fanavaozam-pirenena, iarahana amin’ny minisi-panjakana misahana ny Fanavaozana izany», hoy izy ireo tetsy 67Ha, omaly. Notsindrin’izy ireo fa anisan’ny anjara asan’ ity komity ity ny fampiraisana sy fampivondronana ny fiarahamonina miozolimanina. Eo koa ny fandrindrana sy fanomanana ny fandraisana anjaran’ireo mpino ao aminy ho amin’ny fanavaozana. Manampy izany ny fanangonana ny hevitra rehetra, miainga avy any amin’ny faritra ary manolotra ny fehinkevitra nasionaly amin’ireo Andrimpanjakana sy ireo mpiara-miombona antoka. Anisan’ny lohahevitra amin’izany ny fampandrosoana ny lafiny sosialy, ny toekarena ary ny fandriampahalemana. Tafiditra ao anatin’ izany koa ny fifandraisana iraisam-pirenena. Ny fanavaozana sy ny ny fitondrana. Ny angovo, ny harena an-kibon’ ny tany ary koa ny toekarena manga.
Araka izany, miantso ireo mpino silamo rehetra amin’ny sehatra misy azy avy ny eo anivon’ny KN-FPMM mba hifanohana sy handray anjara amin’izany fikaonandoha izany. «Mba ho an’ny tombontsoan’ny fiarahamonintsika sy ny firenena», hoy ihany izy ireo.
Synèse R.
French