Notanterahina teny amin’ny CCI Ivato, ny 12 sy 13 febroary teon ny Brio Connect. Mpitantana sy tompona orinasa ary mpampiasa vola maherin’ny 100 avy eto an-toerana sy any ivelany no nihaona, nifanakalo hevitra, momba ny fandraharahana, ny haino aman-jery ary ny fiaraha-miasa ara-toekarena.
Natsangan’ny Brio Madagascar, iarahana amin’ny Yas Madagascar, Stellarix, Miarakap ary Piqla, ity hetsika ity. Mikendry ny hamorona sehatra ho an’ny fifandraisana. “Tanjona ny hampiroborobo ny fifanakalozan-kevitra ary hanangana fiaraha-miasa maharitra”, hoy ny tale jeneraly lefitry ny Brio Connect, Raoelina Mandresy.
Nanasongadina Rasata Rafaravavitafika, minisitry ny Raharaham-bahiny teo aloha sady mpitantana ny “Centre d’études et d’analyse stratégique” ao amin’ny minisitera, ankehitriny, fa “ hetsika entin’ny tanora malagasy, mampifandray ny mpandraharaha eto Madagasikara amin’ireo any ivelany ny Brio Connect.” Nomarihiny fa “toerana stratejika i Madagasikara eo afovoan’i Afrika sy ny ranomasimbe Indianina ary afaka mitana anjara toerana ho tetezana voajanahary eo amin’i Afrika, Azia ary Moyen-Orient”. Nambarany koa fa “iray amin’ny varavarana misokatra ho an’ny tanora malagasy ny Brio Connect ».
Ho an’ny Yas Business, mpanohana lehibe ny hetsika, ilaina ny fifanakalozana maty paika mba hanomezana lanja sy hanolorana vahaolana mifanaraka amin’ny zava-misy eny an-kianja.
Nampahafantarina nandritra io roa andro io ihany koa ny gazety Brio, izay mikendry ny ho angon-kevitra ho an’ny mpisehatra ara-toekarena. Tanjon’ ny mpikarakara ny hanamafy ny fifandraisan’ny samy mpandraharaha sy hitarika amin’ny fandrosoana maharitra eto amin’ny firenena.
Henintsoa
French