Misesisesy ny halatra moto tato ho ato. Lehilahy miisa telo tratra nanao izany tao amin’ny orinasa iray eny Manakambahiny, omaly maraina, tokony ho tamin’ny 1 ora. Tra-tehaky ny polisy manao fisafoana teny amin’ny lalana Anjohy ho any amin’ny Rond-point Ambanidia, izy ireo. Nanosika moto ny iray ary nanao taingin-droa tamin’ny moto iray ny roa hafa. Nomena baiko hijanona izy ireo rehefa tonga teo akaikin’ny polisy. Nandositra avy hatrany anefa izy ireo, tamin’izany. Raikitra ny fifanenjehana ary voasambotra teo Ambanidia ny iray, nanosika ilay kodiaran-droa. Tafaporitsaka ny roa, saingy tratra omaly atoandro tetsy Manakambahiny ihany. Niaiky ny heloka nataony izy ireo, rehefa nohadihadian’ny polisy. Niray tsikombakomba tamin’ny mpiambina ilay orinasa izy ireo ka nahafahany nanao ny halatra, raha ny fanazavana voaray ihany.
Ankoatra izay, lehilahy iray hafa tratran’ny olona nangalatra moto tetsy Manakambahiny, omaly hariva. Nokasain’ity farany hoentina sy hangalarina ny kodiaran-droa ana lehilahy iray nandefa vola teo amin’ny Cash point. Efa novelomin’ity farany ilay moto ary efa saika hoentiny. Nahatsikaritra izany ny tompony ka nisambotra azy avy hatrany. Tezitra ny mponina teny amin’ ny manodidina ka nidaroka ity olon-dratsy. Efa nosamborin’ny polisy ity farany ary miatrika fanadihadiana.
Mino
French