AOMMM : Hitari-dalana ny tantsambo ara-barotra

Tari-dalana ho an’ny tantsambo ara-barotra sy hitondra ny fahaiza-manaony eto an-toerana ary hanandratra avo ny hasin’ny andraikitra sahaniny ny AOMMM.

Hanofana, hanampy ary hanohana ny fahaiza-manaon’ireo zandry. Hitazona ny kalitao sy ny lentan’ny tantsambo ara-barotra ary hitsinjo manokana ireo zoky efa nisotro ronono. Ireo no tanjona apetraky ny Fikam­banan’ny manamboninahitra tantsambo ara-barotra eto Madagasikarana (AOMMM), nandritra ny fivoriambe voalohany nataony hampahafantarana ny rafitra, ny zoma teo, tetsy amin’ny Le Pavé Am­pandrana. Nankatoavin’ireo mpikambana nandritra izany avokoa ny tetikasa iomba­nana, ny sata mifehy ny fikambanana ary ny fitsipika ana­tiny. Dingana lehibe ho an’ireo manamboninahitra tantsambo ara-barotra ny fananganana ny vovonana, noho izy maneho ny finiavana sy hitari-dalana ireo mpikambana ary hitondra avo ny voninahitry ny tantsam­bo ara-barotra eto Madagasikara. Kendrena hatrany ny haha matihanina ny rafitra mba hi­tondra rivo-baovao eto amin’ ny firenena. “Fitaratra sy ma­miratra eo amin’ny sehatra iraisam-pirenena ny tantsambo ara-barotra eto Madagasi­kara”, hoy ny filohan’ny fikambanana, Second capitaine de première classe, Manambala Adoré. Notsindriny manokana fa mahafantatra ny fahaiza-manaon’ny Malagasy ny any ivelany ary tanjona ny hiza­rana ny traikefa eto an-toe­rana. Hiara-miasa amin’ny fanja­kana sy ny Agence portuaire maritime et fluviale (APMF), araka izany, ny vovonana hampandrosoana ny rafitry ny varotra an-dranomasina sy hanohanana ny tan­tsambo malagasy.
Manodidina ny 70 isa an­kehitriny ireo mpikambana eo anivon’ny AOMMM.
Asa

Mizara roa mazava tsara ny asan’ny tantsambo ara-barotra. Misy ireo miantoka tanteraka ny fampandeha­nana ny sambo sy ny lafiny ara-teknika, misy kosa ireo miandraikitra ny raharaha ara-barotra, izany hoe, ireo mampiditra sy mamoaka ny en­tana. Efa misy ihany koa ny vehivavy miditra amin’ny asa saingy mbola vitsy an’isa izany, izay mbola 2% monja. “Maha­­sarika ny tanora ihany koa ny asa saingy tsy fantany ny zavatra miandry azy, ka antony hijoroan’ny fikambanana”, raha ny fanazavana hatrany. Araka izany, miara-miasa amin’ny École nationale maritime (ENM) ny fikambananana mba hitari-dalana ireo zandry vonona hisehatra ao anatin’ny tontolo misy ireto manamboninahitra ireto.

Henintsoa