Nidina tany Antsirabe ireo delegasionina ao amin’ny Ivontoeram-pikarohana iraisam-pirenena CGIAR, ahitana ny Africa Rice, ny Ilri, ny CIP, ny Icrisat ary ny IITA. Nojerena ifotony ny fiaraha-miasa amin’ny eto an-toerana toy ny Fofifa, ny Fifamanor, ny CFAMMA, ny SOC ary ny Imvavet.
Nofantarina ny olan’ny fotodrafitrasa, ny mpikaroka tsy ampy isa sady misy ny mandeha misotro ronono, ny tsy fahampian’ny fitaovana sy ny tetibola. Nohamafisin’ny sekretera jeneralin’ny minisiteran’ny
Fambolena sy ny fiompiana (Minae), Randriambololona Lambotiana Fabien, fa « tsy maintsy ho dinihin’ny fitondrana, ankehitriny, ny fomba hampidirana tanora mpikaroka, handimby ireo lasa nisotro ronono».
Maro ny voka-pikarohana efa nivoaka, toy ny nahitana ny karazam-bary Fofifa 198, fiaraha-miasan’ny Africa Rice sy ny Fofifa, nankatoavin’ny SOC. Tian’ny tantsaha tokoa satria mahazaka tondradrano sy hatsiaka sady tsara ny vokatra avy aminy. Nihatsara ny fari-piainan-dRabritonirina Théo, mpamboly any Tsivatrinikamo, manana tanimbary 3 ha, satria nitombo ny vola niditra, nahavitany trano. Notsorin’ny tale jeneralin’ny Africa Rice, ny Dr Baboucarr Manneh, fa «izay no tena tanjona, ny hitomboan’ny fidiram-bolan’ny tantsaha, hahavitan-tenan’i Madagasikara ara-tsakafo».
Vala tahaka lehibe
Notsidihina ny laboratoaran’ny Fofifa, ny famokaran’ny Fifamanor ny Azota ary ny laboratoaran’ny CIP, famokarana masomboly ovy sy vomanga vaovao. Nanaitra ny rehetra ny fitsidihana ny vala tahaka lehibe (parc d’innovation), ahitana ny voka-pikarohan’ny CGIAR sy ny ivontoeram-pikarohana eto an-toerana. «Angonina ato ny teknolojia hita maneran-tany, ijerena izay azo hampiharina eto Madagasikara. Toerana anandramana sy ampiharana ny voka-pikarohana sady fanofanana ny tantsaha sy fanodinam-bokatra», hoy i Serge Merisson, avy amin’ny IITA Madagasikara. Nandramana ny karazan-tsakafo sy zava-pisotro vita amin’ ny mangahazo, ny vary gasy mena sy fotsy, ny ravitoto ary mofomamy vita amin’ny sorgho.
Nilaza i Pieter Wauters, avy amin’ny CIP, fa ampianarina hanodina ny ovy ihany koa ny tantsaha. Namaranana ny fotoana ny nanasoniavana ny fiaraha-miasa eo amin’ny CIP sy ny Fifamanor.
Njaka Andriantefiarinesy
French