Nifarana omaly, tao amin’ny Novotel Antananarivo, ny andiany faharoa an’ny « CEO Summit Indian Ocean » notanterahina nandritra ny roa andro. Miroso amin’ny asa ny rehetra hampivoarana ny toekarena, amin’ny alalan’ny vokatra azo tsapain-tanana.
Fanapahan-kevitra telo lehibe no nankatoavina nandritra ity fihaonana natao ny 9 sy 10 avrily ity. Eo ny fananganana ny Vovonana ifanakalozana ara-toekarena eo amin’ny faritra mba hampifandray ireo mpisehatra sy hanafaingana ny fiaraha-miasa. Manaraka izany, hapetraka ho ivon’ny paikady ny fandraharahana amin’ny fambolena mitodika amin’ny tsena (agribusiness) ho antoka
amin’ny fahaleovan-tena ara-tsakafo sy ara-toekarena. Hatsaraina ihany koa ny «innovation et intelligence économique» mba hanamafisana ny fandraisana fanapahan-kevitra. Nanamarika ity CEO Summit ity ny fanaovan-tsonia fiaraha-miasa lehibe. Voalohany, ny fifanarahana eo amin’ny minisiteran’ny Indostria sy ny varotra avy ao Ginea Konakry sy ny minisiteran’ny Varotra sy ny fanjifana malagasy, miaraka amin’ny minisiteran’ny Fampiroboroboana ny indostria sy ny fampivelarana ny sehatra tsy miankina hanokafana lalana vaovao amin’ny indostria sy ny fampiasam-bola. Toy izany koa, ny fiaraha-miasa eo
amin’ny Economic Development Board of Madagascar sy La Réunion Développement izay manamafy ny fifandraisana ara-toekarena.
Vonona ny sehatra tsy miankina
Nanamafy ny filohan’ny Sendikan’ny indostria eto Madagasikara, Rasamimanana Tiana fa «zava-dehibe ny fiaraha-miasa eo amin’ny firenena afrikanina sy ny fampiharana ny fampihodinana ara-toekarena eto amin’ny faritra». Tsy maintsy mifanindry an-dalana, hoy izy, ny fanjakana, ny sehatra tsy miankina ary ny mpiara-miombon’antoka ara-teknika sy ara-bola. Nanome toky ny tenany fa «vonona ny sehatra tsy miankina. Mila manaraka izany ny mpitondra fanjakana. Fotoana izao hanaovana asa fa tsy kabary intsony». Hatao any La Réunion, amin’ny 2027, ny andiany manaraka amin’ny CEO Summit, izay antenaina hanamafy sy hampiseho vokatra mivaingana.
Henintsoa
French