Hosokafana ny alahady izao ao amin’ny Ekar Mb Terezin’i Jesoa Zazakely, Ivato ny faha-30 taonan’ny antoko mpihira «Voix de Sainte Therese – VST». Homarihina amin’ny alalan’ny eokaristia Masina izany sady itondrana am-bavaka ny fikambanana amin’izao. Hitohy amin’ny antsam-panahy iarahana amin’ny «Voix du Carmel» Itaosy izany ny tolakandro, ao amin’ny fiangonana katolika Mb Terezin’i Jesoa Zazakely ihany. Mbola hisy ny hetsika samihafa amin’ity taona 2026 ity..
Tsiahivina fa nitsangana ny avrily 1997 ny VST. Mampiavaka azy ny fiaraha-miasa amin’ireo mpanankanto sy ny fivoahana any amin’ny faritra. Iray amin’ireny ny antsam-panahy voalohany ny taona 1997, niarahana tamin’i Bessa tao amin’ ny Ekar Ivato. Ny nivoahana indroa miantoana tany Mahajanga ny aogositra 2016 sy ny oktobra 2021. Nanaovana antsam-panahy niarahana amin’
ny APKM tao amin’ny katedraly Mahajanga. Ny nanaovana seho tao amin’ny Ekar Ambohimena Antsirabe ny taona 2017. «Efa fanaonay isan-taona koa ny manao antsam-panahy, amin’ny fankalazana ny fetin’i Mb Terezy, mpiaro ny fikambanana. Hanasana ireo antoko mpihira manodidina avy amin’ny FJKM sy ny FLM na koa avy any ivelany izany», hoy ny mpikambana, i Nicole.
Nanteriny fa maherin’ny 30 eo ho eo ireo mpikambana ary maro ireo efa nandalo tao. Ao koa anefa ireo mpanorina mbola miaraka amin’ireo zandry aty aoriana.
HaRy Razafindrakoto
French